മാഡ്രിഡ്: ആ ചുംബന വിവാദം അവസാനിക്കുന്നില്ല. ഏറ്റവും പുതിയ വാര്‍ത്ത സ്‌പെയിന്‍ വനിതാ സംഘം ലോകകപ്പ് സ്വന്തമാക്കുമ്പോള്‍ ടീമിന്റെ പരിശീലകനായിരുന്ന ലൂയിസ് റുബിയാലസിനെതിരെ മൂന്ന് വര്‍ഷത്തെ വിലക്ക് വന്നിരിക്കുന്നു. സ്പാനിഷ് ഫുട്‌ബോള്‍ അസോസിയേഷനാണ് വിലക്ക് നല്‍കിയിരിക്കുന്നത്.
ഇതിനകം ഫിഫയുടെ വിലക്ക് അദ്ദേഹത്തിനുണ്ട്. അതിനിടെയാണ് സ്വന്തം അസോസിയേഷന്‍ വിലക്കും വന്നിരിക്കുന്നത്. ഫിഫ വനിതാ ലോകകപ്പ് സ്‌പെയിന്‍ സ്വന്തമാക്കിയപ്പോള്‍ സ്വന്തം താരം ഹോര്‍മോസയെ കോച്ച് ചുംബിച്ചിരുന്നു. ഇതാണ് വലിയ വിവാദമായത്. ചുണ്ടിലെ ചുംബനത്തിനെതിരെ താരമുള്‍പ്പെടെ പലരും രംഗത്ത് വന്നതോടെയാണ് കോച്ച് കുരുങ്ങിയത്. ഓസ്‌ട്രേലിയന്‍ നഗരമായ സിഡ്‌നിയില്‍ നടന്ന ലോകകപ്പ് ഫൈനലില്‍ കരുത്തരായ ഇംഗ്ലണ്ടിനെ പരാജയപ്പെടുത്തിയായിരുന്നു ചരിത്രത്തില്‍ ആദ്യമായി സ്‌പെയിന്‍ ലോകകപ്പ് സ്വന്തമാക്കിയത്. അതിന്റെ ആഹ്ലാദ പ്രകടനത്തിനിടെയുണ്ടായ ചുംബന വിവാദമാവട്ടെ ആ നേട്ടത്തിന്റെ കരുത്തെല്ലാം ഇല്ലാതാക്കി. സംഭവത്തില്‍ സ്പാനിഷ് പ്രധാനമന്ത്രിക്ക് പോലും ഇടപെടേണ്ടി വന്നു. കോടതിയിലുമെത്തി.നിലവില്‍ വിഷയം കോടതി പരിഗണനയിലുമാണ്.