ഗാസയിലെ ഏറ്റവും വലിയ ആശുപത്രിയായ അല്‍-ഷിഫയുടെ ഡയറക്ടറെ അറസ്റ്റ് ചെയ്ത് ഇസ്രാഈല്‍ സൈന്യം. ഡോ. മുഹമ്മദ് അബു സല്‍മിയയേയും മറ്റു മുതിര്‍ന്ന ഡോക്ടര്‍മാരേയുമാണ് അറസ്റ്റ് ചെയ്തത്. അല്‍-ഷിഫ ആശുപത്രി ഹമാസ് താവളമെന്നാരോപിച്ചായിരുന്നു അറസ്റ്റ്.
നേരത്തെ രണ്ട് ഫലസ്തീന്‍ പാരാമെഡിക്കുകളെ ഇസ്രാഈല്‍ സേന അറസ്റ്റ് ചെയ്തിരുന്നതായി അല്‍ ജസീറ റിപ്പോര്‍ട്ട് ചെയ്തിരുന്നു. വടക്കന്‍ ഗാസയില്‍ ഇസ്രാഈല്‍ ഏറ്റവുമധികം ആക്രമിക്കുന്നത് അല്‍-ഷിഫ ആശുപത്രിയെയാണ്. കഴിഞ്ഞ ആഴ്ചയില്‍ ആശുപത്രിയില്‍ ഇസ്രാഈല്‍ റെയ്ഡ് നടത്തിയിരുന്നു. അല്‍-ഷിഫ ആശുപത്രി കേന്ദ്രീകരിച്ചാണ് ഹമാസിന്റെ പ്രവര്‍ത്തനമെന്ന് ആരോപിച്ചായിരുന്നു ഇസ്രാഈലിന്റെ ഈ നീക്കവും.
എന്നാല്‍ ഹമാസും ആശുപത്രി അധികൃതരും ഈ അവകാശവാദങ്ങള്‍ ആവര്‍ത്തിച്ച് നിഷേധിച്ചിരുന്നു. ഗാസയിലെ അല്‍-ഷിഫ അടക്കമുള്ള ആശുപത്രികളെ കമാന്‍ഡ് കേന്ദ്രങ്ങളായി ഉപയോഗിക്കുന്നുണ്ടെന്ന ആരോപണം ഹമാസ് നിഷേധിച്ചു. ഇസ്രാഈലും അമേരിക്കയും ‘ക്രൂരമായ കൂട്ടക്കൊലകളെ’ ന്യായീകരിക്കാന്‍ ശ്രമിക്കുന്നതായി ഹമാസ് ആരോപിക്കുകയും ചെയ്തിരുന്നു.
അതേസമയം, ജബലിയ ക്യാമ്പിലെ ആക്രമണത്തില്‍ 4 പേര്‍ കൊല്ലപ്പെട്ടു. നുസൈറത്ത് അഭയാര്‍ത്ഥി ക്യാമ്പിലുണ്ടായ ആക്രമണത്തില്‍ അഞ്ച് പേരാണ് കൊല്ലപ്പെട്ടത്. കഴിഞ്ഞ ദിവസം ഖത്തറിന്റെ മധ്യസ്ഥതയില്‍ നടത്തിയ ചര്‍ച്ചകള്‍ക്ക് പിന്നാലെ ഗാസയില്‍ താത്ക്കാലിക വെടിനിര്‍ത്തലിന് ധാരണയായിരുന്നു. കരാറിന് ഇസ്രാഈല്‍ സര്‍ക്കാര്‍ അംഗീകാരം നല്‍കുകയും ചെയ്തു.