തിരുവനന്തപുരം: വിവാദ ക്ഷേത്ര പ്രവേശന വിളംബരത്തിന്റെ 87 ആം വാര്‍ഷിക ദിനാഘോഷത്തിന്റെ വിവാദ നോട്ടിസില്‍ നടപടിയുമായി തിരുവിതാംകൂര്‍ ദേവസ്വം ബോര്‍ഡ്. നോട്ടിസ് ഇറക്കിയ സാംസ്കാരിക വിഭാഗം ഡയറക്ടര്‍ ബി മധുസൂദനന്‍ നായരെ സ്ഥലം മാറ്റി.
ഇന്നലെ ചേര്‍ന്ന ദേവസ്വം ബോര്‍ഡ് യോഗത്തിന്റേതാണ് തീരുമാനം. ഹരിപ്പാട് ഡെപ്യൂട്ടി ദേവസ്വം കമ്മീഷണറായാണ് സ്ഥലം മാറ്റം. ക്ഷേത്രപ്രവേശന വിളംബരത്തിന്റെ 87ാം വാര്‍ഷികാഘോഷങ്ങള്‍ക്കായി തയ്യാറാക്കിയ നോട്ടീസാണ് വിവാദമായത്. അടിമുടി രാജഭക്തി വെളിവാക്കുന്ന നോട്ടീസില്‍ പരിപാടിയിലെ അതിഥികളായ രാജകുടുംബാംഗങ്ങളെ വിശേഷിപ്പിക്കുന്നത് രാജ്ഞിമാര്‍ എന്നും തമ്പുരാട്ടിമാര്‍ എന്നുമായിരുന്നു.
രാജാവിന്റെ ഔദാര്യമായാണ് ക്ഷേത്രപ്രവേശന വിളംബരം നടന്നതെന്ന തരത്തിലുള്ള പരാമര്‍ശങ്ങള്‍ ഉള്‍പ്പെടുത്തിയാണ് നോട്ടീസ് പുറത്തിറക്കിയത്. വിവാദമായതിനെ തുടര്‍ന്ന് നോട്ടീസ് പിന്നീട് പിന്‍വലിച്ചു.