കോണ്‍ഗ്രസ്, യൂത്ത് കോണ്‍ഗ്രസ് സമരങ്ങളെ പൊലീസ് നേരിടുന്നത് ക്രൂരമായിട്ടെന്ന് പ്രതിപക്ഷ നേതാവ് വി ഡി സതീശന്‍. സമരങ്ങളെ ചോരയില്‍ മുക്കികൊല്ലുന്ന ക്രൂരനും രക്തദാഹിയുമായ മുഖ്യമന്ത്രിയാണ് പിണറായി വിജയന്‍ എന്ന് പ്രതിപക്ഷ നേതാവ് കണ്ണൂരില്‍ വാര്‍ത്താ സമ്മേളനത്തില്‍ പറഞ്ഞു. ഇതേ രീതിയിലാണ് സമരത്തെ നേരിടുന്നതെങ്കില്‍ സമീപനത്തില്‍ മാറ്റം വരുത്തേണ്ടി വരുമെന്നും വി ഡി സതീശന്‍ പറഞ്ഞു.
ഒരുകാലത്തും ഇല്ലാത്ത തരത്തില്‍ പൊലീസിനെ ഉപയോഗിച്ച് യുവജനങ്ങളെ വേട്ടയാടുകയാണ് സര്‍ക്കാര്‍. പിണറായി വിജയന്റെ നിര്‍ദേശപ്രകാരമാണിത്. ഇതുകൊണ്ടൊന്നും സമരം നിര്‍ത്താന്‍ പോകുന്നില്ല. കേരളത്തെ തകര്‍ത്തതിന് എതിരായ പ്രതിഷേധം ഇനിയും ഉണ്ടാകുമെന്ന് വി ഡി സതീശന്‍ പറഞ്ഞു.
അഴിമതിക്കാരനായ മുഖ്യമന്ത്രിയാണ് കേരളം ഭരിക്കുന്നത്. അദ്ദേഹത്തിന്റെ കുടുംബവും അഴിമതിയില്‍പ്പെട്ടിരിക്കുകയാണ്. അതെല്ലാം പുറത്തുകൊണ്ടുവരും. മുഖ്യമന്ത്രിയുടെ പൊയ്മുഖം കേരളത്തിന് മുന്നില്‍ അനാവരണം ചെയ്യപ്പെടും. ഒരു വിട്ടുവീഴ്ച്ചയ്ക്കും തയ്യാറല്ലെന്നും വി ഡി സതീശന്‍ പറഞ്ഞു.
കരുവന്നൂര്‍ അഴിമതിയില്‍ ഒന്നാം പ്രതി സിപിഎം നേതാക്കളാണ്. ഇന്ന് മന്ത്രിമാരായി ഇരിക്കുന്നവര്‍ വരെ തെറ്റായ രീതിയില്‍ വായ്പ അനുവദിക്കാന്‍ പ്രോത്സാഹിപ്പിച്ചു. മന്ത്രി പി രാജീവിനെതിരെ ബാങ്ക് സെക്രട്ടറി മൊഴി നല്‍കിയിട്ടുണ്ട്. അനാവശ്യമായി സ്വാധീനിച്ച് തെറ്റായ ലോണ്‍ കൊടുക്കാന്‍ ശ്രമിച്ചുവെന്നാണ് മൊഴി. സിപിഎമ്മിന്റെ ഉത്തരവാദിത്തപ്പെട്ട നേതാക്കളെല്ലാം അതില്‍ പ്രതിയാണ്. ഇക്കാര്യത്തില്‍ എന്‍ഫോഴ്‌സ്‌മെന്റ് ഡയറക്ട്രേറ്റ് എന്താണ് ചെയ്യാന്‍ പോകുന്നത് എന്നാണ് കാത്തിരിക്കുന്നത് എന്നും വി ഡി സതീശന്‍ പറഞ്ഞു.
യൂത്ത് കോണ്‍ഗ്രസ് അധ്യക്ഷന്‍ രാഹുല്‍ മാങ്കൂട്ടത്തിലിനെ നിരന്തരം ജയിലില്‍ അടക്കാനുള്ള ശ്രമമാണ് സര്‍ക്കാര്‍ നടത്തുന്നതെന്നും വി ഡി സതീശന്‍ ആരോപിച്ചു. ജയിലിന് പുറത്തുള്ള രാഹുല്‍ മാങ്കൂട്ടത്തിലിനേക്കാള്‍ ആയിരം ഇരട്ടി ശക്തിയുള്ള യൂത്ത് കോണ്‍ഗ്രസ് പ്രസിഡന്റായിരിക്കും നിങ്ങള്‍ ജയിലില്‍ അടച്ചിരിക്കുന്ന രാഹുല്‍ മാങ്കൂട്ടത്തില്‍ എന്നും തെന്നും വി ഡി സതീശന്‍ പറഞ്ഞു.