ബൈക്ക് പോത്തിനെ ഇടിച്ചതിനെ തുടര്‍ന്ന് ജനക്കൂട്ടം 16കാരനെ മര്‍ദിച്ചു കൊലപ്പെടുത്തി. ഝാര്‍ഖണ്ഡിലെ ധുംക ജില്ലയില്‍ ഞായറാഴ്ച വൈകീട്ടാണ് സംഭവം. ഫുട്ബാള്‍ മത്സരം കഴിഞ്ഞ് കൂട്ടുകാരോടൊപ്പം ബൈക്കില്‍ മടങ്ങുകയായിരുന്നു 16കാരന്‍.
താതി ഗ്രാമത്തില്‍ വെച്ച് ബൈക്ക് ഒരു പോത്തിനെ ഇടിക്കുകയായിരുന്നു. തുടര്‍ന്ന് കുട്ടിയും സ്ഥലത്തുണ്ടായിരുന്ന ആളുകളും തമ്മില്‍ വാക്കേറ്റമുണ്ടായി. പോത്തിന്റെ ഉടമക്ക് നഷ്ടപരിഹാരം നല്‍കാമെന്ന് പറഞ്ഞെങ്കിലും ജനക്കൂട്ടം ക്രൂരമായി മര്‍ദിക്കുകയായിരുന്നെന്ന് പൊലീസ് പറഞ്ഞു.
മര്‍ദനത്തില്‍ ബോധരഹിതനായ കുട്ടിയെ ഉടന്‍ ആശുപത്രിയിലെത്തിച്ചെങ്കിലും മരിച്ചു. 16കാരന്റെ സുഹൃത്തുക്കള്‍ക്കും മര്‍ദനമേറ്റിരുന്നു. ഇവര്‍ സ്ഥലത്തു നിന്ന് ഓടിരക്ഷപ്പെടുകയായിരുന്നു.
കേസെടുത്ത് അന്വേഷണം തുടരുകയാണെന്ന് പൊലീസ് അറിയിച്ചു. പ്രതികളെ ഉടന്‍ അറസ്റ്റ് ചെയ്യണമെന്നാവശ്യപ്പെട്ട് കൊല്ലപ്പെട്ട കുട്ടിയുടെ പ്രദേശവാസികള്‍ റോഡ് ഉപരോധിച്ചു. 2 ദിവസത്തിനകം അറസ്റ്റുണ്ടാകുമെന്ന ഉറപ്പിലാണ് ഉപരോധം അവസാനിപ്പിച്ചത്.