15 കാരിയെ ആശ്രമത്തില്‍ ബന്ധിയാക്കി 2 വര്‍ഷത്തിലധികം പീഡിപ്പിച്ചു മഠാധിപതി അറസ്റ്റില്‍. വിശാഖപട്ടണം വെങ്കോജിപാലത്തെ സ്വാമി ജ്ഞാനാനന്ദ ആശ്രമം മേധാവി സ്വാമി പൂര്‍ണാനന്ദയെയാണ് പൊലീസ് അറസ്റ്റ് ചെയ്തത്. 63 കാരനായ മഠാതിപതിയെ ഇത് രണ്ടാം തവണയാണ് ബലാത്സംഗ കുറ്റം ചുമത്തി അറസ്റ്റ് ചെയ്യുന്നത്.
2 വര്‍ഷത്തിലധികമായി തന്നെ ആശ്രമത്തില്‍ ബന്ധിയാക്കി മഠാതിപതി ലൈംഗികമായി പീഡിപ്പിച്ചു എന്ന് പെണ്‍കുട്ടി പരാതിനല്‍കിയതോടെയാണ് ഇയാള്‍ പിടിയിലായത്. ചെറുപ്പത്തില്‍ തന്നെ മാതാപിതാക്കള്‍ നഷ്ടപ്പെട്ട പെണ്‍കുട്ടിയെ ബന്ധുക്കള്‍ ആശ്രമത്തിന്റെ കീഴില്‍ നടത്തുന്ന അനാഥാലയത്തില്‍ അയക്കുകയായിരുന്നു.
എന്നും രാത്രി സ്വാമി തന്നെ കിടപ്പുമുറിയിലേക്ക് കൊണ്ടുപോയി ബലാത്സംഗം ചെയ്യുമായിരുന്നു എന്ന് കുട്ടിയുടെ പരാതിയില്‍ പറയുന്നു. കഴിഞ്ഞ ഒരു വര്‍ഷമായി ഇയാള്‍ തന്നെ കിടപ്പുമുറിയില്‍ കെട്ടിയിട്ടിരിക്കുകയാണ്. എല്ലാ ദിവസവും രണ്ട് സ്പൂണ്‍ ഭക്ഷണം നല്‍കുമായിരുന്നു. ആഴ്ചയില്‍ ഒരു തവണ മാത്രമാണ് തന്നെ കുളിക്കാന്‍ അനുവദിച്ചിരുന്നത് എന്നും കുട്ടി പറഞ്ഞു.
ജൂണ്‍ 13ന് ആശ്രമത്തില്‍ നിന്നു രക്ഷപ്പെട്ട പെണ്‍കുട്ടി ഒരു ട്രെയിനില്‍ കയറുകയും ഒരു യാത്രക്കാരിയോട് വിവരം പറയുകയും ചെയ്തു. കുട്ടിയെ ആശുപത്രിയില്‍ പ്രവേശിപ്പിക്കാന്‍ ശ്രമിച്ചപ്പോള്‍ ആശുപത്രി അധികൃതര്‍ പൊലീസിന്റെ കത്ത് ആവശ്യപ്പെട്ടു. കത്ത് വാങ്ങിയ ശേഷം യാത്രക്കാരി പെണ്‍കുട്ടിയെ ശിശുക്ഷേമ സമിതിയിലെത്തിച്ചു. തനിക്ക് ഏല്‍ക്കേണ്ടിവന്ന ലൈംഗികാതിക്രമങ്ങള്‍ തുറന്നുപറഞ്ഞതോടെ ശിശുക്ഷേമ സമിതി കുട്ടിയെ പൊലീസ് സ്റ്റേഷനിലെത്തിച്ചു. തുടര്‍ന്നാണ് പൊലീസ് കേസെടുത്തത്.
തനിക്കെതിരെ ഉയര്‍ന്ന ആരോപണങ്ങള്‍ സ്വാമി പൂര്‍ണാനന്ദ തള്ളി. ചിലര്‍ തന്റെ ആശ്രമം കൈക്കലാക്കാന്‍ ശ്രമിക്കുകയാണെന്നും ഇതിനു വേണ്ടിയാണ് ഇപ്പോള്‍ ആരോപണങ്ങള്‍ ഉയര്‍ത്തുന്നതെന്നും ഇയാള്‍ പറഞ്ഞു. പെണ്‍കുട്ടിയെ കാണാനില്ലെന്ന് കാട്ടി ജൂണ്‍ 15ന് ആശ്രമം അധികൃതര്‍ പൊലീസില്‍ പരാതിപ്പെട്ടിരുന്നു. 2012ല്‍ ഇതേ ആശ്രമത്തില്‍ വച്ച് പ്രായപൂര്‍ത്തിയാവാത്ത മറ്റൊരു പെണ്‍കുട്ടിയെ ബലാത്സംഗം ചെയ്തതുമായി ബന്ധപ്പെട്ട് ഇയാള്‍ക്കെതിരെ കേസെടുത്തിരുന്നു.