കൊച്ചി: സാങ്കേതിക തകരാര്‍ മൂലം എയര്‍ ഇന്ത്യയുടെ കൊച്ചി ലണ്ടന്‍ പ്രത്യേക വിമാനം റദ്ദാക്കി. ഉച്ചയ്ക്ക് 1.20ന് നെടുമ്പാശ്ശേരി വിമാനത്താവളത്തില്‍ നിന്ന് പുറപ്പെടേണ്ട എയര്‍ ഇന്ത്യയുടെ വിമാനമാണ് റദ്ദാക്കിയത്.
150ലധികം യാത്രക്കാരാണ് വിമാനത്തില്‍ യാത്ര ചെയ്യേണ്ടിയിരുന്നത്. ഉച്ചക്ക് പുറപ്പെടേണ്ട വിമാനത്തിന് സാങ്കേതിക തകരാറുള്ള കാര്യം വൈകീട്ട് അഞ്ചര വരെ യാത്രക്കാരെ അറിയിച്ചില്ല. ഭക്ഷണമടക്കം കഴിക്കാതെ വിമാനത്താവളത്തില്‍ മണിക്കൂറുകളോളമാണ് യാത്രക്കാര്‍ കാത്തിരുന്നത്.
യാത്രക്കാരെ ഹോട്ടലിലേക്ക് മാറ്റും. മുംബൈയില്‍ നിന്നടക്കമുള്ള വിദഗ്ധ സംഘമെത്തി തകരാര്‍ പരിഹരിച്ച ശേഷം മാത്രമേ വിമാനം പുറപ്പെടുകയുള്ളു.
18ാം തീയതിയാണ് നെടുമ്പാശ്ശേരിയില്‍ നിന്ന് ലണ്ടനിലേക്ക് നേരിട്ട് വിമാന സര്‍വീസ് ആരംഭിക്കുന്നത്. ആഴ്ചയില്‍ മൂന്ന് തവണയാണ് പ്രത്യേക സര്‍വീസ്.