ചെന്നൈ: എം.എസ് ധോണി എന്ന നായകന് ചെന്നൈ സൂപ്പര്‍ കിംഗ്‌സ് ടീമുമായി ബന്ധപ്പെട്ട എല്ലാ തീരുമാനവും കൈ കൊള്ളാന്‍ സ്വതന്ത്രാവകാശമുണ്ടെന്ന് ടിം സി.ഇ.ഒ കാശി വിശ്വനാഥന്‍. അദ്ദേഹം ടീമിന്റെ അവിഭാജ്യ ഘകമാണ്. പ്രായത്തിന്റെ പ്രയാസങ്ങളുണ്ടെങ്കിലും അതൊന്നും ഒരിക്കലും പ്രകടിപ്പിക്കാറില്ല. കാല്‍മുട്ടിലെ വേദനയെക്കുറിച്ച് ഇത് വരെ പറഞ്ഞിട്ടില്ല. അദ്ദേഹത്തിന് കളിക്കാം. കളിക്കാതിരിക്കാം. അതെല്ലാം എം.എസിന്റെ തീരുമാനമാണ്. അദ്ദേഹത്തിലെ നായകനെയും എല്ലാവരും ആഗ്രഹിക്കുന്നു.
ഇത്തവണ ഫൈനലിന് മുമ്പ് പരുക്കിനെക്കുറിച്ച് ഒന്നും ഔദ്യോഗികമായി പറഞ്ഞിരുന്നില്ല. ഫൈനലിന് ശേഷം അദ്ദേഹം പറഞ്ഞു- കാല്‍മുട്ടില്‍ ശസ്ത്രക്രിയക്കായി മുംബൈയിലേക്ക് പോവുകയാണെന്ന്. ഇപ്പോള്‍ സര്‍ജറി കഴിഞ്ഞ് വിശ്രമിക്കുന്നു. വിരമിക്കാന്‍ അദ്ദേഹത്തിന് ആഗ്രഹമുണ്ട്. പക്ഷേ ടീമിനെ കൈവിടാനും അദ്ദേഹത്തിനാവുന്നില്ല. ജഡേജയും എം.എസും തമ്മില്‍ ഒരു പ്രശ്‌നവുമില്ല. എം.എസിനെ സഹോദരനെ പോലെ ബഹുമാനിക്കുന്ന അനുജനാണ് ജഡേജയെന്നും കാശി ഒരഭിമുഖത്തില്‍ പറഞ്ഞു.