ന്യൂഡല്‍ഹി: അളളാഹുവിന്റെ 99 പേരുകളില്‍ ഒന്നിനും അക്രമം എന്നര്‍ത്ഥമില്ലെന്ന് വിദേശകാര്യമന്ത്രി സുഷമാ സ്വരാജ്. എല്ലാ മതങ്ങളും സമാധാനത്തിനും സാഹോദര്യത്തിനും സഹാനുഭൂതിക്കുമാണ് നിലക്കൊളളുന്നതെന്നും 57 രാജ്യങ്ങളുടെ കൂട്ടായ്മയായ ഒഐസിയില്‍ പങ്കെടുത്ത് സുഷമാ സ്വരാജ് പറഞ്ഞു. തെറ്റായി നയിക്കപ്പെടുന്ന വിശ്വാസങ്ങളും മതങ്ങളെ വക്രീകരിക്കുന്നതുമാണ് ഭീകരവാദത്തിന് വഴിമരുന്നിടുന്നത്. ഇസ്ലാമിക രാജ്യങ്ങളുടെ ഉച്ചകോടിയില്‍ ഭീകരവാദത്തിന്റെ ഭീഷണി ഉന്നയിച്ച് സംസാരിക്കുകയായിരുന്നു അവര്‍.
ഭീകരവാദത്തിന് എതിരായ പോരാട്ടം ഒരു മതത്തിനും എതിരല്ലെന്നും സുഷമാ സ്വരാജ് പറഞ്ഞു. ഇസ്ലാം എന്നാല്‍ സമാധാനം എന്നാണ് അര്‍ത്ഥം.
അതിര്‍ത്തിയില്‍ ഇന്ത്യയും പാകിസ്ഥാനും തമ്മിലുളള സംഘര്‍ഷം പുകയുന്ന സാഹചര്യത്തിലാണ് സുഷമയുടെ വാക്കുകള്‍. ആദ്യമായാണ് ഇസ്ലാമിക രാജ്യങ്ങളുടെ കൂട്ടായ്മയായ ഒഐസിയില്‍ ഇന്ത്യയെ ക്ഷണിക്കുന്നത്. അതുകൊണ്ട് തന്നെ സുഷമാസ്വരാജിന് പ്രത്യേക ക്ഷണിതാവ് എന്ന പദവി നല്‍കിയാണ് സ്വീകരിച്ചത്. സുഷമാ സ്വരാജിനെ ഉച്ചകോടിയില്‍ ക്ഷണിച്ചതില്‍ പ്രതിഷേധിച്ച് പാകിസ്ഥാന്‍ വിദേശകാര്യമന്ത്രി ഷാ മുഹമ്മദ് ഖുറേഷി വിട്ടുനിന്നു.
അതിര്‍ത്തി കടന്നുള്ള തീവ്രവാദം അവസാനിപ്പിക്കാന്‍ പാകിസ്ഥാന്‍ തയ്യാറാകണണം. പാകിസ്ഥാന്‍ തീവ്രവാദം അവസാനിപ്പിക്കാതെ മേഖലയില്‍ സമാധാനം പുലരില്ലെന്നും സുഷമ സ്വരാജ് പറഞ്ഞു. ഇന്ത്യയിലെ മുസ്ലിം വിഭാഗം സഹിഷ്ണുതയുടെ മാതൃകയാണ് അവര്‍ തീവ്രവാദത്തിന് എതിരാണെന്നും അവര്‍ കൂട്ടിച്ചേര്‍ത്തു.