കോട്ടയം: പ്രണയവിവാഹത്തിന്റെ പേരില്‍ കൊല്ലപ്പെട്ട കെവിന്റെ വിവാഹം സംബന്ധിച്ച് വെളിപ്പെടുത്തലുമായി സബ് രജിസ്ട്രാര്‍ കെ.ജി ശ്രീകുമാര്‍ രംഗത്ത്. കെവിനും നീനുവും തമ്മിലുള്ള വിവാഹം സാധുവായിട്ടില്ലെന്നാണ് ശ്രീകുമാര്‍ പറയുന്നത്.
ഇരുവരും വിവാഹം രജിസ്റ്റര്‍ ചെയ്യാനായി ഓണ്‍ലൈന്‍ അപേക്ഷ മാത്രമാണ് സമര്‍പ്പിച്ചിട്ടുള്ളത്. അസ്സല്‍ രേഖകള്‍ സമര്‍പ്പിക്കുകയോ ഫീസ് അടക്കുകയോ ചെയ്തിട്ടില്ലാത്തതിനാല്‍ വിവാഹ രജിസ്‌ട്രേഷനുള്ള അപേക്ഷ സ്വീകരിച്ചിട്ടില്ലെന്നും ശ്രീകുമാര്‍ പറഞ്ഞു. കെവിന്‍ നീനുവിനും സാക്ഷികള്‍ക്കുമൊപ്പം വക്കീല്‍ ഓഫീസില്‍ എത്തി ഓണ്‍ലൈന്‍ വിവാഹ അപേക്ഷ സമര്‍പ്പിക്കുക മാത്രമാണ് ചെയ്തത്.
ഓണ്‍ലൈന്‍ ആയി അപേക്ഷ നല്‍കിയാലും യഥാര്‍ത്ഥ രേഖകളുടെ പകര്‍പ്പുമായി സബ് രജിസ്ട്രാര്‍ക്കു മുന്നിലെത്തി ഫോട്ടോയില്‍ സാക്ഷ്യപ്പെടുത്തി ഫീസ് അടക്കണം. ഇതിനു ശേഷം ഇരുവരുടെയും പേരുവിവരങ്ങള്‍ നോട്ടീസ് ഒരു മാസത്തേക്ക് സബ് രജിസ്ട്രാര്‍ ഓഫീസിലെ നോട്ടീസ് ബോര്‍ഡില്‍ പ്രദര്‍ശിപ്പിക്കും.
ഒരു മാസത്തിനു ശേഷം ഇവര്‍ വീണ്ടും എത്തി സബ് രജിസ്ട്രാറുടെയും സാക്ഷികളുടെയും സാന്നിധ്യത്തില്‍ രേഖകളില്‍ ഒപ്പിടണം. ഇതിനു ശേഷം മാത്രമേ വിവാഹം സാധുവാകുകയുള്ളൂ. എന്നാല്‍ കെവിന്റെയും നീനുവിന്റെയും കാര്യത്തില്‍ ഇതൊന്നും സംഭവിച്ചിരുന്നില്ലെന്നതിനാല്‍ ഇരുവരുടെയും വിവാഹം സാധുവായിട്ടില്ലെന്ന് കെ.ജി ശ്രീകുമാര്‍ പറഞ്ഞു.