പുതുതായി കുവൈറ്റില്‍ എത്തുന്ന പ്രവാസികള്‍ക്ക് മെഡിക്കല്‍ ടെസ്റ്റിന് കർശന വ്യവസ്ഥകള്‍ ഏർപ്പെടുത്തിക്കൊണ്ട് ഉത്തരവിറക്കി.
ആരോഗ്യമന്ത്രി ഡോ.അഹ്മദ് അല്‍ അവാദിയുടെ പുതിയ തീരുമാനമനുസരിച്ച്‌, കുവൈറ്റിലേക്ക് പുതുതായി വരുന്ന പ്രവാസിയുടെ ഹെപ്പറ്റൈറ്റിസ് സി യുടെ ലബോറട്ടറി പരിശോധനയില്‍ ഫലം പോസിറ്റീവ് ആണെങ്കില്‍ രാജ്യത്ത് പുതുതായി വന്ന റെസിഡൻസി അപേക്ഷകനെ വൈദ്യശാസ്ത്രപരമായി അയോഗ്യനായി കണക്കാക്കും. ഈ വ്യക്തിക്ക് പിസിആർ ടെസ്റ്റിന് വിധേയരാകാൻ അനുമതിയുണ്ടാവില്ല .
അതേസമയം പരിശോധനയില്‍ ഫലം അനിശ്ചിതത്വമാണ് കാണിക്കുന്നതെങ്കില്‍ അത്തരം പ്രവാസികള്‍ക്ക് കുറഞ്ഞത് നാല് മാസം സമയം നല്‍കും. അതിനിടയില്‍ പിസിആർ പരിശോധനയില്‍ പോസിറ്റീവ് ഫലമാണെങ്കില്‍ ആ വ്യക്തിയെ താമസരേഖ ലഭിക്കുന്നതിന് അയോഗ്യനായാണ് പരിഗണിക്കുക .
എന്നാല്‍ വൈറല്‍ ഹെപ്പറ്റൈറ്റിസ് സി പരിശോധനയില്‍ ഫലം അനിശ്ചിതത്വത്തിലുള്ള ഒരാള്‍ക്ക് പി സി ആർ പരിശോധനയിലൂടെ ഫലം നെഗറ്റീവ് കാണിച്ചാല്‍ ഒരു വർഷത്തേയ്ക്ക് റെസിഡൻസി പെർമിറ്റ് അനുവദിക്കും. ഒരു വർഷം കഴിഞ്ഞാല്‍ വീണ്ടും പി സി ആർ പരിശോധനയിലൂടെ ഫലം നെഗറ്റീവായാല്‍ മാത്രമേ അത്തരക്കാർക്ക് സ്ഥിരം റെസിഡൻസി പെർമിറ്റ് അനുവദിക്കുകയുള്ളൂവെന്നും പുതിയ വ്യവസ്ഥയിലുണ്ട് .