സംസ്ഥാന കാര്‍ഷിക ഗ്രാമവികസന ബാങ്കിലെ അഡ്മിനിസ്റ്റര്‍ ഭരണത്തിന് വിരാമമിട്ട് യു.ഡി.എഫ് പാനല്‍ വിജയിച്ചു. നേരത്തെ പൊതുയോഗത്തില്‍ അവിശ്വാസം കൊണ്ടുവന്ന് നിലവിലുണ്ടായിരുന്ന യു.ഡി.എഫ് ഭരണത്തെ പുറത്താക്കി അഡ്മിനിസ്റ്റര്‍ ഭരണം തുടരുകയായിരുന്നു.
ഒന്നര വര്‍ഷത്തിന് ശേഷം അഡ്മിനിസ്റ്റര്‍ ഭരണത്തിനെതിരെ യു.ഡി.എഫ് നേതാക്കള്‍ കോടതിയെ സമീപിക്കുകയായിരുന്നു. നേതാക്കളായ ശിവദാസന്‍ നായരും സി കെ ഷാജിമോഹനും നല്‍കിയ കേസിന്റെ അടിസ്ഥാനത്തില്‍ കോടതി 2023 മെയ് അഞ്ചിനകം തിരഞ്ഞെടുപ്പ് നടത്താന്‍ ഉത്തരവിട്ടു. പിന്നീട് നടന്ന തിരഞ്ഞെടുപ്പില്‍ നോമിനേഷനും വോട്ടും തള്ളാന്‍ ശ്രമം നടത്തിയെന്ന് ആരോപിച്ച് യു.ഡി.എഫ് നേതാക്കള്‍ ഹൈക്കോടതിയെ സമീപിച്ചിരുന്നു. തുടര്‍ന്ന് തര്‍ക്കമുളള രണ്ട് വോട്ടുകള്‍ പ്രത്യേക ബോക്‌സില്‍ സൂക്ഷിച്ച് തിരഞ്ഞെടുപ്പ് നടത്താന്‍ ഹൈക്കോടതി നിര്‍ദ്ദേശിക്കുകയായിരുന്നു. പിന്നീട് സികെ ഷാജിമോഹന്‍ നല്‍കിയ മറ്റൊരു കേസില്‍ പ്രത്യേക പെട്ടിയില്‍ സൂക്ഷിച്ചിരുന്ന വോട്ട് എണ്ണിതിട്ടപ്പെടുത്തി ഫലം പ്രഖ്യാപിക്കാന്‍ കോടതി നിര്‍ദ്ദേശിച്ചു.
ഇന്ന് 11 മണിക്കായിരുന്നു വോട്ട് എണ്ണിയത്. രണ്ട് വോട്ടും യു.ഡി.എഫ് പാനലിന് അനുകൂലമാവുകയായിരുന്നു. 36 നെതിരെ 38 വോട്ടുകള്‍ നേടിയായിരുന്നു യു.ഡി.എഫ് ഭരണം തിരിച്ച് പിടിച്ചത്. കൗണ്ടിംഗ് നടത്തി ഫലം പ്രഖ്യാപിക്കാന്‍ കോടതി വിധിയുണ്ടായിട്ടും റിട്ടേണിംഗ് ഓഫീസര്‍ അതിന് തയ്യാറായില്ലെന്ന് യുഡിഎഫ് ആരോപിച്ചു. റിട്ടേണിംഗ് ഓഫീസര്‍ക്കെതിരെ കോടതിയലക്ഷ്യത്തിന് കേസ് കൊടുക്കാനാണ് തീരുമാനം.
യു.ഡി.എഫ് പാനലില്‍ നിന്ന് ഭരണ സമിതിയിലേക്ക് ശിവദാസന്‍ നായര്‍, സി കെ ഷാജി മോഹന്‍, എ നീലകണ്ഠന്‍, ടി.എ നവാസ്, റോയി.കെ പൗലോസ്, എസ് മുരളിധരന്‍ നായര്‍, ഫില്‍സണ്‍മാത്യുസ്, ടി.എം കൃഷ്ണന്‍, എസ്.കെ അനന്തകൃഷ്ണന്‍, വി.പി അബ്ദുറഹിമാന്‍, ആവോലം രാധാകൃഷ്ണന്‍, മേഴ്‌സി സാമുവല്‍, ഷീല ഒ ആര്‍, പി.കെ രവി എന്നിവര്‍ തിരഞ്ഞെടുക്കപ്പെട്ടു.