ചെന്നൈ: മാര്‍ച്ച് ഒമ്പതിനും പത്തിനും ചെന്നൈയില്‍ നടക്കുന്ന മുസ്്‌ലിം ലീഗ് പ്ലാറ്റിനം ജൂബിലി സമ്മേളനം പ്രൗഡോജ്വല വിജയമാക്കാന്‍ ചെന്നൈയില്‍ ഒരുക്കങ്ങള്‍ തകൃതി. ഒമ്പതിന് നടക്കുന്ന പ്രതിനിധി സമ്മേളനത്തില്‍ രാജ്യത്തെ ഒട്ടുമിക്ക സംസ്ഥാനങ്ങളില്‍ നിന്നും പ്രതിനിധികള്‍ എത്തിച്ചേരും. ഉത്തരേന്ത്യല്‍ സംസ്ഥാനങ്ങളില്‍ നിന്നുള്ള പ്രധിനിധികളുടെ രജിസ്‌ട്രേഷന്‍ പൂര്‍ത്തിയായിക്കഴിഞ്ഞു. കേരളം, തമിള്‍നാട് എന്നീ സംസ്ഥാനങ്ങളിലെ പ്രതിനിധി രജിസ്‌ട്രേഷന്‍ പുരോഗമിക്കുകയാണ്. പ്രതിനിധികളുടെ ഓണ്‍ലൈന്‍ രജിസ്‌ട്രേഷന്‍ 28 ന് സമാപിക്കും. ആപ്പ് വഴി ഓണ്‍ലൈന്‍ രെജിസ്‌ട്രേഷന്‍ നടത്തിയ പ്രതിനിധികള്‍ക്ക് മാത്രമേ പ്രധിനിധികളെന്ന ആനുകൂല്യങ്ങള്‍ ലഭിക്കുകയുള്ളൂ.
രജിസ്‌ട്രേഷന്‍ കാര്യങ്ങള്‍ക്ക് മേല്‍നോട്ടം വഹിക്കുന്ന ജില്ലാ കോഡിനേറ്റര്‍മാരും പോഷക സംഘടനാ കോഡിനേറ്റര്‍മാരും ഈ കാര്യങ്ങള്‍ പ്രത്യേകം ശ്രദ്ധിക്കണം. മാര്‍ച്ച് 10 ന് നടക്കുന്ന പ്ലാറ്റിനം ജൂബിലി മഹാറാലിയില്‍ തമിഴ്‌നാട് മുഖ്യമന്ത്രി എം.കെ സ്റ്റാലിന്‍ ആണ് മുഖ്യാതിഥി. റാലിയില്‍ രാജ്യത്തിന്റെ വിവിധ ഭാഗങ്ങളില്‍ നിന്നെത്തുന്ന ലക്ഷങ്ങള്‍ അണിനിരക്കും. റാലിക്ക് വേദിയാകുന്ന കൊട്ടിവാക്ക്കം വൈ.എം.സി.എ ഗ്രൗണ്ടിനോട് ചേര്‍ന്ന് സ്വാഗത സംഘം ഓഫീസ് മുഴുവന്‍ സമയവും പ്രവര്‍ത്തിച്ച് വരികയാണ്. ചെന്നൈ നഗരത്തില്‍ നിന്ന് 12 കിലോമീറ്റര്‍ മാറി മെയിന്‍ ഹൈവേയിലാണ് പൊതുസമ്മേളനം നടക്കുന്ന ഖാഇദെ മില്ലത്ത് നഗര്‍ ഒരുക്കിയിട്ടുള്ളത്.
കേരളത്തിലെ എല്ലാ പഞ്ചായത്തുകളില്‍ നിന്നും പ്രവര്‍ത്തകരെ ചെന്നൈയിലെത്തിക്കാന്‍ പാര്‍ട്ടി ഘടകങ്ങള്‍ ശ്രദ്ധിക്കണം. വാഹനങ്ങളില്‍ എത്തുന്ന പ്രവര്‍ത്തകര്‍ റൂട്ട്, പ്രവര്‍ത്തകരുടെ എണ്ണം, ടീം ലീഡറുടെ പേര് എന്നിവ ഇതിനായി തയ്യാറാക്കിയ ആപ്പ് മുഖേന രജിസ്ട്രര്‍ ചെയ്യണം. പ്രവര്‍ത്തകര്‍ക്ക് യാത്രാ മധ്യേ ഫ്രഷ് ആകാനുള്ള പരമാവധി സൗകര്യങ്ങള്‍ ഏര്‍പ്പെടുത്താന്‍ ദേശീയ കമ്മിറ്റി ശ്രദ്ധിക്കുന്നുണ്ട്. ദേശീയ സമ്മേളനത്തിലേക്ക് മാര്‍ച്ച് ഒമ്പതിന് പോകാന്‍ ആഗ്രഹിക്കുന്ന മുസ്‌ലിം ലീഗ് പ്രവര്‍ത്തകര്‍ക്കായി ദേശീയ കമ്മിറ്റിയുടെ അഭ്യര്‍ത്ഥന മാനിച്ച് റെയില്‍വേ ബോര്‍ഡ് ട്രെയിന്‍ അനുവദിച്ചിട്ടുണ്ട്. മാര്‍ച്ച് ഒമ്പതിന് വൈകിട്ട് മംഗലാപുരത്ത് നിന്ന് പുറപ്പെട്ട് മാര്‍ച്ച് 10 കാലത്ത് ഏഴിന് ചെന്നൈയിലെത്തിച്ചേരും. തിരിച്ച് മാര്‍ച്ച് 10 രാത്രി 11 മണിക്ക് ചെന്നൈയില്‍ നിന്ന് മടങ്ങി മാര്‍ച്ച് 11 ന് രാവിലെ കേരളത്തില്‍ എത്തും.
ഈ ട്രെയിനില്‍ സീറ്റ് ബുക്ക് ചെയ്യാന്‍ ആഗ്രഹിക്കുന്ന സംഘടനാ പ്രവര്‍ത്തകര്‍ കാസര്‍ക്കോട് മുതല്‍ പാലക്കാട് വരെയുള്ള ജില്ലാ കമ്മിറ്റി ഓഫീസുകളില്‍ ബന്ധപ്പെടണം. പഞ്ചായത്തുകളില്‍ നിന്ന് സ്‌പെഷ്യല്‍ വാഹനങ്ങളില്‍ പുറപ്പെടുന്ന പാര്‍ട്ടി പ്രവര്‍ത്തകര്‍ക്ക് പോകുന്ന വഴിയില്‍ കുളിക്കാനും മറ്റും പ്രാഥമിക സൗകര്യമൊരുക്കുന്നതിന് ഓരോ വാഹനവും ടീം ലീഡറെ വെച്ച് ആപ്പ് ഉപയോഗിച്ച് മണ്ഡലം കോഡിനേറ്റര്‍ വഴി രജിസ്റ്റര്‍ ചെയ്യണം. മേല്‍പ്പറഞ്ഞ കാര്യങ്ങള്‍ സമയ ബന്ധിതമായി പൂര്‍ത്തിയാക്കാന്‍ മുഴുവന്‍ ഘടകങ്ങളിലെയും ഭാരവാഹികള്‍ ജാഗ്രതയോട് കൂടി ശ്രദ്ധിക്കണമെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി അഭ്യര്‍ത്ഥിച്ചു.