കാഠ്മണ്ഡു: സോളോ യാത്രകളും ട്രക്കിങ്ങുകളും ഇഷ്ടപ്പെടുന്നവരാണോ നിങ്ങള്‍. സാഹസിക യാത്രകളും ട്രക്കിങും ഇഷ്ടപ്പെടുന്നുവെങ്കില്‍ നിങ്ങളുടെ മനസിലേക്ക് ആദ്യമെത്തുന്ന രാജ്യം നേപ്പാളായിരിക്കും. എന്നാല്‍ ആ പൂതി ഇനി അധികം നടക്കില്ല. നേപ്പാളില്‍ ഇനി മുതല്‍ ഒറ്റയ്ക്ക് ട്രക്കിങ് നടത്താന്‍ സാധിക്കില്ല.
സഞ്ചാരികളുടെ സുരക്ഷ മുന്‍ നിര്‍ത്തി ഏപ്രില്‍ ഒന്ന് മുതല്‍ രാജ്യത്ത് ട്രക്കിങ്ങിന് ഗൈഡിനെ നിര്‍ബന്ധമാക്കി. നേപ്പാള്‍ ടൂറിസം ബോര്‍ഡിന്റേതാണ് തീരുമാനം. ഏപ്രില്‍ ഒന്ന് മുതല്‍ പുതിയ തീരുമാനം പ്രാബല്യത്തില്‍ വരുമെന്ന് നേപ്പാള്‍ ടൂറിസം ബോര്‍ഡ് ഡയറക്ടര്‍ മണിരാജ് ലാമിച്ചനെ അറിയിച്ചു. വിനോദ സഞ്ചാരികള്‍ തനിച്ച് ട്രക്കിങ് നടത്തുമ്പോള്‍, പലപ്പോഴും വഴിതെറ്റുകയും സുരക്ഷിതമല്ലാത്ത സാഹചര്യങ്ങളില്‍ എത്തിപ്പെടുകയും ചെയ്യും. ആ സാഹര്യത്തിലാണ് സോളോ ട്രക്കിങുകള്‍ നിരോധിക്കാനുള്ള തീരുമാനത്തില്‍ ഞങ്ങള്‍ എത്തിയിരിക്കുന്നത്. ഏപ്രില്‍ 1 മുതല്‍, സാഹസിക വിനോദ സഞ്ചാരത്തിന് ഗൈഡുകള്‍ നിര്‍ബന്ധമാണ് ലാമിച്ചനെ പറഞ്ഞു. നേപ്പാള്‍ ടൂറിസം ബോര്‍ഡിന്റെ കണക്ക് പ്രകാരം 2019ല്‍ നേപ്പാളില്‍ 50,000 വിനോദസഞ്ചാരികളാണ് ഗൈഡിന്റയോ മറ്റോ സഹായമില്ലാതെ ട്രെക്കിങ് നടത്തിയത്. റൂട്ട് പെര്‍മിറ്റും ട്രെക്കേഴ്‌സ് ഇന്‍ഫര്‍മേഷന്‍ മാനേജ്‌മെന്റ് സിസ്റ്റം കാര്‍ഡും നേടിയാണ് ഈ വിനോദ സഞ്ചാരികള്‍ ട്രക്കിങ് നടത്തിയത്.
ട്രക്കേഴ്‌സ് ഇന്‍ഫര്‍മേഷന്‍ മനേജ്‌മെന്റ് സിസ്റ്റം കാര്‍ഡായിരുന്നു സാഹസിക സഞ്ചാരികള്‍ക്ക് ആവശ്യമായ ബേസിക് ട്രക്കിങ്ങ് പെര്‍മിറ്റ്. എന്നാല്‍ പുതിയ തീരുമാന പ്രകാരം ഗൈഡ് ഇല്ലാത്ത പെര്‍മിറ്റ് കാര്‍ഡുകള്‍ ടൂറിസം വകുപ്പ് നിരോധിച്ചിരിക്കുകയാണ്. ട്രക്കേഴ്‌സ് ഇന്‍ഫര്‍മേഷന്‍ മനേജ്‌മെന്റ് സിസ്റ്റം കാര്‍ഡിന്റെ തുകയും ടൂറിസം ബോര്‍ഡ് ഉയര്‍ത്തി. പെര്‍മിറ്റിനായി ഒരു വ്യക്തി 2000 രൂപ നല്‍കണം.