ബാർബിക്യൂ ചിക്കൻ തയാറാക്കിയ ശേഷം കെടുത്താതിരുന്ന കൽക്കരി അടുപ്പിൽ നിന്നുള്ള പുക ശ്വസിച്ച് കൊടൈക്കനാലിൽ രണ്ട് യുവാക്കൾക്ക് ദാരുണാന്ത്യം. തിരുച്ചിറപ്പള്ളി സ്വദേശികളായ ആനന്ദ ബാബു, ജയകണ്ണൻ എന്നിവരാണ് മരിച്ചത്. ശിവശങ്കർ, ശിവരാജ് എന്നീ രണ്ട് സുഹൃത്തുക്കളോടൊപ്പം കൊടൈക്കനാലിൽ എത്തിയ ഇവർ വെള്ളിയാഴ്ച ചിന്നപ്പള്ളത്തെ റിസോർട്ടിലാണ് താമസിച്ചിരുന്നത്.
ഉറങ്ങാന്‍ കിടന്ന മുറിയിലാണ് ഇരുവരെയും മരിച്ചനിലയിൽ കണ്ടെത്തിയത്. ഇവർക്കൊപ്പമുണ്ടായിരുന്ന മറ്റുരണ്ടുപേർ മറ്റൊരു മുറിയിൽ ഉറങ്ങിയതിനാൽ രക്ഷപ്പെട്ടു.
വെള്ളിയാഴ്ചയാണ് യുവാക്കൾ റിസോർട്ടിൽ എത്തിയത്. ലിവിങ് റൂമിൽ ബാർബിക്യൂ ചിക്കൻ പാകം ചെയ്ത ശേഷം അടുപ്പിലെ തീ കെടുത്താതെ സംഘം ഉറങ്ങാൻ കിടക്കുകയായിരുന്നു. രാവിലെ യുവാക്കൾ ഉണരാതിരുന്നതിനെ തുടർന്നാണ് അന്വേഷിച്ചത്.
മെഡിക്കൽ സംഘം എത്തി നടത്തിയ പരിശോധനയിലാണ് മരണം സ്ഥിരീകരിച്ചത്. അടുപ്പ് കെടുത്താതിരുന്നതിനാൽ രൂപപ്പെട്ട വിഷാംശമുള്ള വാതകങ്ങൾ മൂലം ശ്വാസംമുട്ടിയാണ് മരണമെന്ന് പൊലീസ് പ്രാഥമിക അന്വേഷണത്തിനു ശേഷം പറഞ്ഞു. രണ്ട് പേരുടെയും മൃതദേഹങ്ങൾ കൊടൈക്കനാൽ സർക്കാർ ആശുപത്രിയിൽ പോസ്റ്റ്‌മോർട്ടത്തിനായി കൊണ്ടുപോയി. സംഭവത്തിൽ പൊലീസ് കേസെടുത്തിട്ടുണ്ട്.