ആറ് വയസുകാരിയെ കാറിലെത്തി തട്ടിക്കൊണ്ടുപോയ സംഭവത്തില്‍ പൊലീസ് അന്വേഷണം ഊര്‍ജിതമാക്കി. സഹോദരനൊപ്പം ട്യൂഷന് പോകുന്നതിനിടെയാണ് കൊല്ലം പൂയപ്പള്ളി കാറ്റാടിയില്‍ വച്ച് അബിഗേല്‍ സാറ റെജിയെ തട്ടിക്കൊണ്ടുപോയത്.
വൈകീട്ട് 4.45നാണ് കുട്ടിയെ കാറിലെത്തിയ സംഘം തട്ടിക്കൊണ്ടുപോയത്. വെള്ള നിറത്തിലുള്ള ഹോണ്ട കാറിലെത്തിയ സംഘമാണ് തട്ടികൊണ്ടുപോയതെന്നാണ് വിവരം. എട്ട് വയസ്സുകാരന്‍ സഹോദരനൊപ്പം ട്യൂഷന് ക്ലാസിന് പോകുമ്പോഴാണ് സംഭവം. കാറില്‍ മൂന്ന് പുരുഷന്‍മാരും ഒരു സ്ത്രീയും ഉള്‍പ്പെടെ നാലുപേര്‍ ഉണ്ടായിരുന്നുവെന്നാണ് കുട്ടിയുടെ സഹോദരന്റെ മൊഴി.
കുട്ടികളുമായി സഞ്ചരിക്കുന്ന വാഹനങ്ങള്‍ തടഞ്ഞ് നിര്‍ത്തി പൊലീസ് പരിശോധിക്കും. കൊല്ലം റൂറല്‍ എസ്.പി സംഭവ സ്ഥലത്തേക്ക് തിരിച്ചിട്ടുണ്ട്. റെയില്‍വേ സ്‌റ്റേഷനുകളിലും പരിശോധന നടത്തുന്നുണ്ട്. എല്ലാ സ്‌റ്റേഷനുകളിലും പരിശോധനയ്ക്ക് ആര്‍പിഎഫിന് നിര്‍ദേശം നല്‍കി. കുട്ടിയുടെ ചിത്രം സഹിതം സന്ദേശങങ്ങളയച്ചിട്ടുണ്ട്. എല്ലാ സ്‌റ്റേഷനുകളിലേക്കും കണ്‍ട്രോള്‍ റൂമില്‍ നിന്ന് നിര്‍ദേശം നല്‍കി.