തിമിര ശസ്ത്രക്രിയക്ക് വിധേയരായ രോഗികള്‍ക്ക് കാഴ്ച ശക്തി നഷ്ടപ്പെട്ടതായി പരാതി. കാന്‍പൂരിലെ വൃദ്ധസദനത്തില്‍ നടന്ന നേത്ര ചികിത്സാ ക്യാമ്പില്‍ തിമിര ശസ്ത്രക്രിയയ്ക്ക് വിധേയരായ ആറ് രോഗികളുടെ കാഴ്ച്ച ശക്തിയാണ് നഷ്ടപ്പെട്ടത്. സംഭവത്തില്‍ സിഎംഒയ്ക്ക് പരാതി നല്‍കിയിട്ടുണ്ട്. അടിയന്തര അന്വേഷണത്തിന് ആരോഗ്യ വകുപ്പ് ഉത്തരവിട്ടു.
ഡിബിസിഎസ് പദ്ധതി പ്രകാരം നവംബര്‍ രണ്ടിനായിരുന്നു ശസ്ത്രക്രിയ ക്യാമ്പ് സംഘടിപ്പിച്ചത്. സൗജന്യ നേത്ര പരിശോധന ക്യാമ്പില്‍ വെച്ച് ശിവരാജ്പൂര്‍ നിവാസികളായ രോഗികള്‍ തിമിര ശസ്ത്രക്രിയയ്ക്ക് വിധേയരാവുകയായിരുന്നു. ഡോ. നീരജ് ഗുപ്തയാണ് ഇവരുടെ ശസ്ത്രക്രിയ നടത്തിയത്.
ശസ്ത്രക്രിയയ്ക്ക് ശേഷം രോഗികള്‍ ആശുപത്രി വിട്ടിരുന്നു. ഓപ്പറേഷന് ശേഷം കണ്ണില്‍ വേദന അനുഭവപ്പെടുകയും പിന്നാലെ കാഴ്ച നഷ്ടപെടുകയായിരുന്നു എന്ന് രോഗികള്‍ പറഞ്ഞു. ആശുപത്രിയില്‍ പോയി പരാതി പറഞ്ഞപ്പോള്‍ മരുന്ന് നല്‍കി തിരികെ അയക്കുകയായിരുന്നു.