കോഴഞ്ചേരിയില്‍ സി.ഐ അധിക്ഷേപിച്ചതിന് പിന്നാലെ എസ്.ഐ ഇറങ്ങിപ്പോയി. തുടര്‍ന്ന് സഹപ്രവര്‍ത്തകര്‍ റെയില്‍വേ സ്റ്റേഷനിലെത്തി തിരികെ കൊണ്ടുവന്നു. തര്‍ക്കത്തില്‍ ഇടപെട്ട ജില്ലാ പൊലീസ് മേധാവി ഇരുവരെയും വിളിച്ചുവരുത്തി ചര്‍ച്ച നടത്തി.
ആറന്മുള പൊലീസ് സ്റ്റേഷനില്‍ ഇന്ന് ഉച്ചക്കാണ് സംഭവം നടന്നത്. എസ്.എച്ച്.ഒ പ്രവീണ്‍, എസ്‌ഐ അലോഷ്യസിനെ സ്റ്റേഷനില്‍ വെച്ച് അധിക്ഷേപിച്ചതിനെ തുടര്‍ന്ന് മാനസികമായി ബുദ്ധിമുട്ടിലായ എസ്.ഐ ഡ്യൂട്ടിക്കിടെ ഇറങ്ങിപ്പോകുകയായിരുന്നു. എന്നാല്‍ സഹപ്രവര്‍ത്തകര്‍ ചെങ്ങന്നൂര്‍ റെയില്‍വേ സ്റ്റേഷനില്‍ ഇദ്ദേഹത്തെ കണ്ടെത്തി തിരിച്ചു കൊണ്ടു വരുകയായിരുന്നു. വിവരം അറിഞ്ഞ എസ്.പി വി.ജി. വിനോദ് കുമാര്‍ ഇരുവരെയും ജില്ലാ പൊലീസ് ആസ്ഥാനത്തേക്ക് വിളിച്ചു വരുത്തി. അലോഷ്യസിന് സ്റ്റേഷന്‍ മാറ്റി നല്‍കാമെന്ന് എസ്.പി അറിയിച്ചു.
ഇന്‍സ്പെക്ടര്‍ മാനസികമായി നിരന്തരം പീഡിപ്പിക്കുന്നുവെന്നാണ് എസ്.ഐയുടെ പരാതി.