ദുബായ്: കഴിഞ്ഞ ദിവസം നടന്ന ഏഷ്യാകപ്പിലെ ഇന്ത്യാ പാകിസ്ഥാന്‍ മത്സരത്തിനിടെ പാക് താരം ശുഹൈബ് മാലികിനെ പുയ്യാപ്ലേ എന്ന് വിളിച്ച് മലയാളികള്‍. ഗ്രൗണ്ടില്‍ ഫീല്‍ഡ് ചെയ്യുന്ന ശുഹൈബിനെ മലയാളികളില്‍ ആരൊക്കെയോ ചേര്‍ന്ന് പുയ്യാപ്ലേ എന്ന് വിളിക്കുകയായിരുന്നു. ഇതിന്റെ ദൃശ്യങ്ങളാണ് സോഷ്യല്‍ മീഡിയയില്‍ വൈറലാകുന്നത്.
മത്സരത്തില്‍ ഇന്ത്യ ബാറ്റ് ചെയ്യുന്നതിനിടെയാണ് ഇന്ത്യന്‍ ടെന്നിസ് താരം സാനിയ മിര്‍സയുടെ ഭര്‍ത്താവായ ശുഹൈബ് മാലിക്കിനെ മലയാളി ആരാധകര്‍ പുയ്യാപ്ലേ എന്ന് വിളിച്ചത്. ബൗണ്ടറിക്കരികില്‍ ഫീല്‍ഡ് ചെയ്യുകയായിരുന്ന താരം ഇടക്ക് തന്റെ പേര് കേട്ട് തിരിഞ്ഞ് നോക്കുന്നുണ്ടെങ്കിലും ഒന്നും മനസിലാവാതെ നില്‍ക്കുകയായിരുന്നു. ഇതോടെ മാലിക് പുയ്യാപ്ലേ എന്ന് വിളിക്കുന്നതിന്റെ ദൃശ്യങ്ങള്‍ സാമൂഹ്യമാധ്യമങ്ങളില്‍ വൈറലായി. പ്രവാസി മലയാളികള്‍ ഏറെയുള്ള ദുബായില്‍ ഇന്നലെ മത്സരം കാണാന്‍ നിരവധി മലയാളികള്‍ എത്തിയിരുന്നു. ഇവരിലാരെങ്കിലുമാവും പുയ്യാപ്ലേ വിളിയുടെ പിറകിലെന്നാണ് സോഷ്യല്‍മീഡിയ സംസാരം.
വന്‍ ആവേശത്തിലാണ് ഇന്ത്യ-പാക്കിസ്താന്‍ കളി കാണാന്‍ ആരാധകരെത്തിയത്. ഇന്ത്യയും പാകിസ്ഥാനും ഏറ്റുമുട്ടുമ്പോള്‍ തീ പാറുമെന്ന് കരുതിയിരുന്ന മത്സരത്തില്‍ പക്ഷേ, ഇന്ത്യന്‍ ആക്രമണത്തിന് മുന്നില്‍ പാക് താരങ്ങള്‍ തകര്‍ന്നടിയുന്ന കാഴ്ച്ചയാണ് കണ്ടത്. ആദ്യം ബാറ്റ് ചെയ്ത് പാകിസ്ഥാന്‍ ഉയര്‍ത്തിയ 163 റണ്‍സിന്റെ വിജയലക്ഷ്യം ഇന്ത്യ 21 ഓവറുകള്‍ ബാക്കിയിരിക്കെ അനായാസേന മറികടക്കുകയായിരുന്നു.