ബിജെപി മുന്‍ ഓഫീസ് സെക്രട്ടറി തിരൂര്‍ സതീഷിന്റെ വീട്ടില്‍ എത്തിയില്ലെന്ന ശോഭാ സുരേന്ദ്രന്റെ വാദം തള്ളി തിരൂര്‍ സതീഷ്. തിരൂര്‍ സതീഷിന്റെ വീട്ടില്‍ ഭാര്യയോടും മകനോടും ഒപ്പം ശോഭാ സുരേന്ദ്രന്‍ നില്‍ക്കുന്ന ചിത്രം തിരൂര്‍ സതീഷ് പുറത്തുവിട്ടു.
സതീഷിന്റെ വീട്ടില്‍ താന്‍ പോയിട്ടില്ലെന്നായിരുന്നു ശോഭാ സുരേന്ദ്രന്‍ ഇന്നലെ വാര്‍ത്താസമ്മേളനത്തില്‍ പറഞ്ഞത്. എന്നാല്‍ ആറുമാസം മുമ്പ് വീട്ടിലെത്തിയതിന്റെ ചിത്രം തിരൂര്‍ സതീഷ് പുറത്തുവിടുകയായിരുന്നു.
കൊടകര കുഴല്‍പ്പണ കേസില്‍ തിരൂര്‍ സതീഷിന്റെ ആരോപണങ്ങള്‍ക്ക് പിന്നില്‍ സിപിഎം ആണെന്നായിരുന്നു ശോഭ സുരേന്ദ്രന്‍ കഴിഞ്ഞ ദിവസം പറഞ്ഞത്. സതീഷ് തന്നെ കാണാന്‍ വന്നിട്ടില്ലെന്നും സതീഷിന്റെ വീട്ടില്‍ ഒരിക്കലും പോയിട്ടില്ലെന്നും ശോഭ സുരേന്ദ്രന്‍ പറഞ്ഞിരുന്നു.
ബിജെപിയെ തകര്‍ക്കാനുള്ള സിപിഎമ്മിന്റെ ശ്രമങ്ങളാണ് ഇതെന്നും സിപിഎമ്മിന്റെ ടൂളാണ് തിരൂര്‍ സതീഷെന്നും തിരക്കഥ എകെജി സെന്ററില്‍ നിന്നുമാണ് എന്നായിരുന്നു ശോഭ സുരേന്ദ്രന്‍ ആരോപിച്ചിരുന്നത്. ഏത് നമ്പറില്‍ നിന്നാണ് സതീഷ് തന്നെ വിളിച്ചതെന്ന് കണ്ടെത്തണമെന്നും കാള്‍ ലിസ്റ്റ് ചെക്ക് ചെയ്യണമെന്നും ശോഭ സുരേന്ദ്രന്‍ ആവശ്യപ്പെട്ടിരുന്നു.
സതീഷനെ കൊണ്ട് കെ സുരേന്ദ്രനെതിരെ പറയിപ്പിച്ച് തനിക്ക് പ്രസിഡന്റ് ആകേണ്ട കാര്യമില്ലെന്നും ശോഭ സുരേന്ദ്രന്‍ പറഞ്ഞിരുന്നു.