എടവണ്ണ. മൂന്ന് സംസ്ഥാനങ്ങളിലെ ബിജെപി വിജയം സൃഷ്ടിപരതയിൽ ഉണ്ടാക്കിയെടുത്തതാണെന്ന് മുസ്ലിംലീഗ് സംസ്ഥാന സെക്രട്ടറി ഷാഫി ചാലിയം പറഞ്ഞു.ജില്ലാ യൂത്ത് ലീഗ് യൂത്ത് മാർച്ച് ഏറനാട് നിയോജക മണ്ഡലം സമാപന സമ്മേളനം എടവണ്ണയിൽ ഉൽഘാടനം ചെയ്ത് സംസാരിക്കുകയായിരുന്നു അദ്ദേഹം.ഭയപ്പെടുത്തിയും വിരട്ടിയും ഉണ്ടാക്കിയെടുത്ത വോട്ടുകളിലാണ് അവർ വിജയം കൊയ്‌തത്. മുസ്ലിം ദളിത് ഭൂരിപക്ഷ മേഖലയിൽ പോലും തങ്ങളുടെ നിലനില്പിനായി ബിജെപിക്ക് വോട്ട് ചെയ്യാൻ വിധിക്കപ്പെട്ടവരായി മാറിയ ദയനീതയാണ് തെരഞ്ഞെടുപ്പ് ഫലം കാണിക്കുന്നത്. എന്നിട്ടും 38 ഉം 40 ഉം 42 ഉം ശതമാനം വോട്ടിംഗ് ഷെയർ കോൺഗ്രസ്സിന് കിട്ടി എന്നത് ചെറിയ കാര്യമല്ലെന്നോർക്കണം.ആ വോട്ടുകൾ സംഖ് പരിവാറിനെ പ്രതിരോധിക്കാനായി പ്രതിജ്ഞയെടുത്ത മതേതര ഹിന്ദുവിന്റേതാണെന്നത് പ്രതീക്ഷാ നിർഭരമാണെന്നും അദ്ദേഹം പറഞ്ഞു.
അടുത്ത ലോകസഭാ തെരഞ്ഞെടുപ്പിൽ ഇന്ത്യാ മുന്നണി ഒത്തുപിടിച്ചാൽ തീർക്കാവുന്ന നമ്പറേ ബിജെപിക്കുണ്ടാവൂ. തെക്കേ ഇന്ത്യയും വംഗനാടും ബീഹാറും ഹിമാചലും പഞ്ചാബും ഡൽഹിയും ബിജെപി സംസ്ഥാനങ്ങളെ വളഞ്ഞാൽ ബിജെപിക്ക് ഇരുന്നൂറ് കടക്കാൻ സാധിക്കി ല്ലെന്നാണ് കണക്കുകൾ സൂചിപ്പിക്കുന്നത്. നിരാശയിൽ തളർന്നു നിലം പതിക്കാതെ പ്രതീക്ഷയുടെ ആവേശമാണ് മതേതര ഇന്ത്യക്കായി നിലകൊള്ളുന്നവർ ചിന്തിക്കേണ്ടതെന്നും ഷാഫി പറഞ്ഞു. പികെ ബഷീർ എം എൽ എ, യു എ ലത്തീഫ് എം എൽ എ തുടങ്ങിയ നേതാക്കൾ പ്രസംഗിച്ചു