തമിഴ്‌നാട്ടില്‍ മലയാളി റെയില്‍വേ ജീവനക്കാരിക്ക് നേരേ ആക്രമണം ഉണ്ടായ സംഭവത്തില്‍ അക്രമി യുവതിയെ ക്രൂരമായി മര്‍ദിച്ചെന്ന് യുവതിയുടെ പിതാവ്. മകളെ അക്രമി ചവിട്ടി വീഴ്ത്തി, ട്രാക്കിലൂടെ വലിച്ചിഴക്കുകയും മുഖത്തും തലയിലും മര്‍ദിച്ചതായും പിതാവ് വെളിപ്പെടുത്തി. സംഭവത്തില്‍ പ്രതിയെ ഇതുവരെ പിടികൂടിയിട്ടില്ല.
തമിഴ്‌നാട്ടില്‍ തെങ്കാശി പാവൂര്‍ഛത്രം റെയില്‍വേ ഗേറ്റില്‍ ഡ്യൂട്ടിയിലുണ്ടായിരുന്ന കൊല്ലം സ്വദേശിയായ യുവതിയാണ് ആക്രമണത്തിനിരയായത്. വ്യാഴം രാത്രി എട്ടുമണിയോടെയാണ് സംഭവം. ഗുരുതരമായി പരുക്കേറ്റ യുവതി തിരുനല്‍വേലിയിലെ സ്വകാര്യ ആശുപത്രിയില്‍ ചികിത്സയിലാണ്. എന്നാല്‍ ആക്രമണം ബലാത്സംഗ ശ്രമമാണെന്നാണ് പൊലീസ് പറയുന്നത്.
റെയില്‍വേ ഗേറ്റില്‍ ഡ്യൂട്ടിയിലുണ്ടായിരുന്ന ജീവനക്കാരി വീട്ടിലേക്ക് ഫോണ്‍ ചെയ്യുന്നതിനിടെയാണ് അക്രമി എത്തിയത്. യുവതിയെ പ്രതി ക്രൂരമായി മര്‍ദിക്കുകയും കല്ല് കൊണ്ട് തലയില്‍ അടിക്കുകയും ചെയ്തതായാണ് റിപ്പോര്‍ട്ട്. അടിയുടെ ആഘാതത്തില്‍ യുവതിയുടെ തലയ്ക്ക് സാരമായി പരുക്കേറ്റിട്ടുണ്ട്. ഉപദ്രവിക്കാന്‍ ശ്രമിക്കുന്നതിനിടയില്‍ യുവതി പുറത്തേക്ക് ഓടുകയായിരുന്നു. പിന്തുടര്‍ന്ന അക്രമി റെയില്‍വേ ട്രാക്കിലൂടെ യുവതിയെ വലിച്ചിഴച്ചയ്ക്കുകയും ലൈംഗികമായി പീഡിപ്പിക്കാനും ശ്രമിച്ചു എന്ന് പൊലീസ് പറഞ്ഞു. സാരമായി പരിക്കേറ്റ യുവതിയെ നാട്ടുകാരാണ് സമീപത്തെ ആശുപത്രിയില്‍ എത്തിച്ചത്.