ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിക്ക് കനത്ത തിരിച്ചടി. ഗോള്‍ കീപ്പര്‍ എഡേഴ്സണ് ഒരു മാസത്തോളം പുറത്തിരിക്കേണ്ടി വരും. ലിവര്‍പൂളിനെതിരായ കഴിഞ്ഞ മത്സരത്തിനിടെ ഡാര്‍വിന്‍ ന്യൂനസുമായുള്ള കൂട്ടിയിടിച്ചതിനെ തുടര്‍ന്നാണ് എഡേഴ്‌സന് പരിക്കേറ്റത്. പിന്നാലെ എഡേഴ്‌സന് പകരക്കാരനായി സ്റ്റെഫാന്‍ ഒര്‍ട്ടേഗയെ മാഞ്ചസ്റ്റര്‍ സിറ്റി കളത്തിലിറക്കിയിരുന്നു.
മാഞ്ചസ്റ്റര്‍ സിറ്റിയുടെ അടുത്ത മത്സരം ഇംഗ്ലീഷ് എഫ്എ കപ്പില്‍ ന്യൂകാസിലിനെതിരെയാണ്. ഒപ്പം പ്രീമിയര്‍ ലീഗില്‍ പോയിന്റ് ടേബിളില്‍ ഒന്നാമതുള്ള ആഴ്‌സനലുമായുള്ള മത്സരവും അടുത്തുവരുകയാണ്. ഈ 2 മത്സരങ്ങളിലും സിറ്റിക്കായി എഡേഴ്‌സന്റെ സാന്നിധ്യം ഉണ്ടാവില്ല. ഒപ്പം ഇംഗ്ലണ്ട്, സ്‌പെയിന്‍ ടീമുകളുമായുള്ള ബ്രസീല്‍ ടീമിന്റെ സൗഹൃദ മത്സരത്തിനും എഡേഴ്‌സന് കളിക്കാന്‍ കഴിയില്ല.
അതിനിടെ എഡേഴ്‌സന് പകരക്കാരനായി മികച്ച പ്രകടനം പുറത്തെടുക്കുമെന്ന് സ്റ്റെഫാന്‍ ഒര്‍ട്ടോഗ പറഞ്ഞു. സിറ്റിക്കായി കളത്തിലിറങ്ങാന്‍ താന്‍ എപ്പോഴും തയ്യാറാണ്. കളിക്കളത്തില്‍ ഏതൊരു നിമിഷവും താന്‍ ആസ്വദിക്കുന്നുവെന്നും ഒര്‍ട്ടേഗ വ്യക്തമാക്കി.