കായികമേളയ്ക്കിടെ ലോങ് ജംപ് താരത്തിന് ഗുരുതര പരുക്ക്. സീനിയര്‍ ആണ്‍കുട്ടികളുടെ ലോങ് ജംപിലാണ് വയനാടിന്റെ മുഹമ്മദ് സിനാന് കഴുത്തിന് ഗുരുതരമായി പരുക്കേറ്റത്. സിനാനെ വിദഗ്ധ ചികിത്സയ്ക്കായി തൃശൂര്‍ മെഡിക്കല്‍ കോളജിലേക്ക് മാറ്റി. ചാട്ടം പൂര്‍ത്തിയാക്കിയ സിനാന് ഗ്രിപ്പ് കിട്ടാതെ മുന്നോട്ടുവീണ് കഴുത്തിന് പരുക്കേല്‍ക്കുകയായിരുന്നു. പ്രഥമ പരിശോധനയില്‍ പരുക്ക് ഗുരുതരമാണെന്ന് കണ്ടെത്തിയതോടെയാണ് സിനാനെ ആശുപത്രിയിലെത്തിച്ചത്. അതേസമയം കഴുത്തിന് പരുക്കേറ്റ് സ്പൈനല്‍ ഇഞ്ച്വറിയുണ്ടെന്ന് സംശയിക്കുന്ന താരത്തിനെ ട്രാക്കില്‍ നിന്ന് കൊണ്ട് പോകുന്നതിലും ആശുപത്രിയിലേക്ക് കൊണ്ട് പോകുമ്പോഴും വിഴ്ച്ചയുണ്ടായതായി പരാതി ഉയര്‍ന്നു. പ്രാഥമിക പരിശീലനം പോലും ലഭിക്കാത്തവരാണ് ഗുരുതര പരുക്കേറ്റയാളെ മാറ്റിയതെന്നാണ് പരാതി.