മുംബൈ: ബോളിവുഡ് നടന്‍ ഷാരൂഖ് ഖാനെതിരെ വെബ്‌സിരീസുകളിലൂടെ ശ്രദ്ധേയയായ നടി സയനി ഗുപ്ത. ദലിത് സഹോദരങ്ങള്‍ക്കായി ശബ്ദമുയര്‍ത്തണമെന്ന് സയനി ഗുപ്ത ആവശ്യപ്പെട്ടു. നമ്മുടെ ദലിത് സഹോദരങ്ങള്‍ക്കായി എന്തെങ്കിലും ഒന്ന് സംസാരിക്കൂവെന്നാണ് സയനി ഷാരൂഖിനോട് ആവശ്യപ്പെട്ടത്. ഹാത്രസില്‍ പത്തൊമ്പതുകാരി കൂട്ടബലാംത്സംഗത്തിനിരയായി മരിച്ച സംഭവത്തില്‍ രാജ്യവ്യാപകമായി പ്രതിഷേധം നടക്കവെയാണ് സയനി ഗുപ്തയുടെ പ്രതികരണം. വിഷയത്തില്‍ ഷാരൂഖ് ഖാന്‍ ഇതുവരെയും പ്രതികരിച്ചിട്ടില്ല.
‘എന്തെങ്കിലും ഒന്ന് സംസാരിക്കൂ. ഗാന്ധി നമ്മളെ സത്യം പറയാനും പഠിപ്പിച്ചിട്ടുണ്ട്. നമ്മുടെ ദലിത് സഹോദരന്‍മാര്‍ക്ക് വേണ്ടി, സഹോദരിമാര്‍ക്ക് വേണ്ടി, ചൂഷണം ചെയ്യപ്പെടുന്നവര്‍ക്ക് വേണ്ടി. നിങ്ങളുടെ വായയും ചെവിയും അടച്ചിടാതിരിക്കൂ,’ സയനി ഗുപ്ത ട്വീറ്റ് ചെയ്തു.
ഒക്ടോബര്‍ രണ്ട് ഗാന്ധി ജയന്തി ദിനത്തില്‍ ഷാരൂഖ് തന്റെ കുട്ടികളുടെ ഫോട്ടോയോടൊപ്പം ഇട്ട ട്വീറ്റിന് മറുപടിയായാണ് സയനി ഗുപ്തയുടെ പ്രതികരണം.
അതേസമയം ബോളിവുഡ് താരങ്ങളായ കരീന കപൂര്‍, സ്വര ഭാസ്‌കര്‍, കങ്കണ റണാവത്, തപ്‌സി പന്നു, അക്ഷയ് കുമാര്‍ തുടങ്ങിയവര്‍ ഹാത്രസ് സംഭവത്തില്‍ പ്രതികരിച്ചിരുന്നു.