റിയാദ്: സൗദി അറേബ്യയ്ക്കും ഖത്തറിനുമിടയില്‍ വിമാന സര്‍വീസുകള്‍ നാളെ (തിങ്കള്‍)മുതല്‍ പുനരാരംഭിക്കും. റിയാദിലേക്കുള്ള സര്‍വീസുകള്‍ ഖത്തര്‍ എയര്‍വേയ്‌സും ദോഹയിലേക്കുള്ള സര്‍വീസുകള്‍ സൗദി എയര്‍ലൈന്‍സും നാളെ മുതല്‍ ആരംഭിക്കും.
ഖത്തറിനും സൗദിക്കുമിടയില്‍ ആദ്യഘട്ടത്തില്‍ റിയാദില്‍ നിന്നും ജിദ്ദയില്‍ നിന്നുമായി ആഴ്ചയില്‍ ഏഴ് സര്‍വീസുകളായിരിക്കും ഉണ്ടാകുകയെന്ന് സൗദി എയര്‍ലൈന്‍സ് അറിയിച്ചു. ജിദ്ദ സര്‍വീസുകള്‍ വ്യാഴാഴ്ച(ജനുവരി 14) മുതലും ദമ്മാം സര്‍വീസുകള്‍ ശനിയാഴ്ച(ജനുവരി 16) മുതലും പുനരാരംഭിക്കും.
റിയാദില്‍ നിന്ന് പ്രതിവാരം നാലു സര്‍വീസുകളും ജിദ്ദയില്‍ നിന്ന് മൂന്ന് സര്‍വീസുകളുമാണ് സൗദി എയര്‍ലൈന്‍സ് ദോഹയിലേക്ക് ഷെഡ്യൂള്‍ ചെയ്തിരിക്കുന്നത്. റിയാദില്‍ നിന്ന് ദോഹയിലേക്കുള്ള ആദ്യ സര്‍വീസ് നാളെ വൈകിട്ട് 4.40ന് പുറപ്പെടുമെന്ന് സൗദി എയര്‍ലൈന്‍സ് അധികൃതര്‍ അറിയിച്ചു.