ലുസൈല്‍ സ്‌റ്റേഡിയത്തില്‍ ഇന്ന് സഊദിക്കാര്‍ മൊത്തമെത്തും. ഇന്നവര്‍ മെക്‌സിക്കോയുമായി കളിക്കുന്ന ദിവസം. ഖത്തറിലെത്തിയ മുഴുവന്‍ മെക്‌സിക്കോക്കാരും ഇന്ന് ലുസൈലില്‍ വരുമ്പോള്‍ ഒന്നുറപ്പ് അടിപൊളിയങ്കം. അര്‍ജന്റീനക്കാരെ ഞെട്ടിച്ചവരാണ് സഊദിക്കാര്‍. ആ വിജയം നല്‍കിയ ആവേശം ഇപ്പോഴും അവസാനിച്ചിട്ടില്ല.
രണ്ടാം മല്‍സരത്തില്‍ പോളണ്ടിന് മുന്നില്‍ തല താഴ്ത്തിയെങ്കിലും ഇന്നത്തെ മല്‍സരത്തിന്റെ പ്രസക്തി സഊദിക്കാര്‍ മനസിലാക്കുന്നു. ഇന്ന് ജയിക്കാത്തപക്ഷം മുന്നോട്ടുള്ള കാര്യങ്ങള്‍ എളുപ്പമല്ല. പോളണ്ട് നാല് പോയിന്റുമായും അര്‍ജന്റീന തൊട്ട് പിറകെയും നില്‍ക്കുമ്പോള്‍ സഊദി മൂന്നാം സ്ഥാനത്തും മെക്‌സിക്കോ ഒരു പോയിന്റുമായി നാലമതുമാണ്. മെക്‌സിക്കോക്കാര്‍ അര്‍ജന്റീനയോടേറ്റ പരാജയത്തിന്റെ ക്ഷീണത്തിലാണ്. ഇന്ന് ജയിച്ചാല്‍ നാല് പോയിന്റാണ് സമ്പാദിക്കാനാവുക. സഊദിയുടെ വഴി അടക്കാം എന്നതിലപ്പറും പ്രി ക്വാര്‍ട്ടര്‍ സാധ്യത കുറവാണ്. മല്‍സരം ഇന്ത്യന്‍ സമയം രാത്രി 1230ന്.