റിയാദ്: സഊദി അറേബ്യ ലോകത്തെ ഏറ്റവും വലിയ അഞ്ചാമത്തെ ശക്തിയാണെന്ന് പുതിയ പഠനം. അമേരിക്കയിലെ ഇന്‍സൈഡര്‍ വെബ്‌സൈറ്റ് പുറത്തിറക്കിയ പട്ടികയിലാണ് ഇക്കാര്യമുള്ളത്. അറബ് ലോകത്തെ ഏറ്റവും വലിയ ശക്തിയും സഊദി തന്നെയാണ്. അമേരിക്കയാണ് ഒന്നാം സ്ഥാനത്ത്. രണ്ടാമത് ചൈനയും മൂന്നാമത് ഇന്ത്യയും നാലാമത് റഷ്യയുമാണ്.
സൈനിക ശക്തി, സൈനിക ആവശ്യങ്ങള്‍ക്കുള്ള ധനവിനിയോഗം, ആയുധങ്ങള്‍ എന്നിവ അടക്കമുള്ള വിവിധ സൂചികകളുടെ അടിസ്ഥാനത്തിലാണ് സഊദി അഞ്ചാം സ്ഥാനത്തെത്തിയത്.
ലോകത്ത് ഏറ്റവും വലിയ ആയുധ ശേഖരവും സൈന്യവുമുള്ളത് അമേരിക്കയിലാണ്. ഇതടിസ്ഥാനത്തിലാണ് അമേരിക്ക ഒന്നാമതു വന്നത്. ഇരുപത് വിമാന വാഹിനി കപ്പലുകളും അമേരിക്കക്ക് സ്വന്തമായുണ്ട്. മറ്റെല്ലാ രാജ്യങ്ങള്‍ക്കുമുള്ള വിമാന വാഹിനി കപ്പലുകളേക്കാള്‍ അധികമാണിത്. സൈനിക കവചിത വാഹനങ്ങളും പോര്‍വിമാനങ്ങളും ഏറ്റവും കൂടുതലുള്ളതും അമേരിക്കക്കാണ്. സൈനിക ആവശ്യങ്ങള്‍ക്കായി ഏറ്റവും കൂടുതല്‍ പണം ചെലവഴിക്കുന്നതും അമേരിക്കയാണ്.