ലോകായുക്ത നിയമഭേദഗതിയില്‍ സി.പി.എം ജനറല്‍ സെക്രട്ടറി സീതാറാം യെച്ചൂരിക്ക് കത്തയച്ച് പ്രതിപക്ഷ നേതാവ് വിഡി സതീശന്‍. കേന്ദ്ര നേതൃത്വം സംസ്ഥാന സര്‍ക്കാറിന് നിര്‍ദേശം നല്‍കണമെന്നാണ് അദ്ദേഹം കത്തില്‍ ആവശ്യപ്പെട്ടത്. സി.പി.എം ലോകായുക്ത, ലോക്പാല്‍ വിഷയങ്ങളില്‍ എടുത്ത നിലപാടിന് വിരുദ്ധമാണ് ഓര്‍ഡിനന്‍സെന്നും അഴിമതിക്കെതിരെ പാര്‍ട്ടി ഇതുവരെ സ്വീകരിച്ച നിലപാടുകള്‍ ജനങ്ങളെ കബളിപ്പിക്കാന്‍ മാത്രമുള്ളതായിരുന്നു എന്ന് കരുതേണ്ടി വരുമെന്നും വിഡി സതീശന്‍ കത്തില്‍ ചൂണ്ടിക്കാട്ടി.നിയമ ഭേഗതി വഴി ഗവര്‍ണറിനൊ മുഖ്യമന്ത്രിക്കോ ലോകായുക്ത വിധിയുടെ മേല്‍ ഹിയറിങ് നടത്തി ലോകായുക്ത മുന്നോട്ട് വയ്ക്കുന്ന നിര്‍ദ്ദേശങ്ങള്‍ തള്ളുകയോ സ്വീകരിക്കുകയോ ചെയ്യാം എന്ന വ്യവസ്ഥയാണ് ഭേദഗതിയിലൂടെ ഉള്‍പ്പെടുത്തിയത്.
ലോകായുക്തയായി തെരഞ്ഞെടുക്കപ്പെടുന്ന വ്യക്തി സുപ്രീം കോടതി ജഡ്ജിയോ അല്ലെങ്കില്‍ ഹൈക്കോടതികളിലെ ചീഫ് ജസ്റ്റിസുമാരോ ആകണമെന്നത് മാറ്റം വരുത്തി ജഡ്ജിയായാല്‍ മതിയെന്നും തീരുമാനിച്ചിരിക്കുകയാണ്. ഇതുവഴി ഇഷ്ടക്കാരെ തിരുകിക്കയറ്റി അവരെ വരുതിയിലാക്കാനുള്ള ശ്രമമാണിത്. സര്‍ക്കാരിനെതിരെ എന്ത് കേസ് നല്‍കിയാലും ഒരു പ്രസക്തിയും ഉണ്ടാകില്ല എന്ന നിലയില്‍ ലോകായുക്തയെ ദുര്‍ബലപ്പെടുത്തുകയെന്നതാണ് ലക്ഷ്യമെന്നും വിഡി സതീശന്‍ കത്തില്‍ പറയുന്നു. അടുത്ത മാസം നിയമസഭാ സമ്മേളനം ആരംഭിക്കാനിരിക്കെ 22 വര്‍ഷം പഴക്കമുള്ള നിയമത്തില്‍ ഭേദഗതി ഓര്‍ഡിനന്‍സ് കൊണ്ടുവരുന്നതിലെ തിടുക്കം ദുരൂഹമാണെന്നും അദ്ദേഹം വ്യക്തമാക്കി.