ബി.ജെ.പി സംസ്ഥാന സെക്രട്ടറി ശോഭാ സുരേന്ദ്രന്റെ വിവാദ പ്രസംഗത്തിന് ശക്തമായ മറുപടിയുമായി എഴുത്തുകാരി എസ് ശാരദക്കുട്ടി. സി.പി.എം സംസ്ഥാന ജനറല്‍ സെക്രട്ടറി കോടിയേരി ബാലകൃഷ്ണനെ അധിക്ഷേപിച്ച് ശോഭാസുരേന്ദ്രന്‍ കോട്ടയത്ത് നടത്തിയ പ്രസംഗത്തോട് പ്രതികരിക്കുകയായിരുന്നു അവര്‍. ശോഭാസുരേന്ദ്രന്റെ പ്രസംഗത്തിലെ ‘കുറെകാലമായില്ലേ ഇനി പോയി ചത്തൂടെ’ എന്ന പരാമര്‍ശത്തിന് കുമാരനാശാന്റെ കവിതയിലൂടെയാണ് ശാരദക്കുട്ടി മറുപടി നല്‍കിയത്. ‘വയസ്സായവരെ എല്ലാം തെക്കോട്ടെടുക്കണം എന്നാണോ ഭാരതീയ സംസ്‌കാരം പഠിപ്പിക്കുന്നത്’ എന്നും എഴുത്തുകാരി ചോദിച്ചു.
കോടിയേരിയെ തെക്കോട്ടെടുക്കാന്‍ സമയമായി എന്നും കോടിയേരിയെ കേരളത്തിന് പുറത്ത് സഞ്ചരിക്കാന്‍ അനുവദിക്കില്ലെന്നും ശോഭാസുരേന്ദ്രന്‍ കോട്ടയത്ത് പ്രസംഗിച്ചിരുന്നു.
പോസ്റ്റിന്റെ പൂര്‍ണ്ണ രൂപം
”വയസ്സായവരെ എല്ലാം തെക്കോട്ടെടുക്കണം എന്നാണോ ഭാരതീയ സംസ്‌കാരം പഠിപ്പിക്കുന്നത്? ‘കുറെകാലമായില്ലേ ഇനീ പോയി ചത്തൂടെ’ എന്നൊക്കെയാണോ നിങ്ങള്‍ ഗുരുവന്ദനവും മാതൃവന്ദനവും കൊണ്ട് അര്‍ഥമാക്കുന്നത്?
‘വെളിവറ്റൊരഴുക്കു കുണ്ടില്‍ വീണളിവു ദുര്‍ജ്ജന പാപ ചേതന’ എന്ന് കുമാരനാശാന്‍ എഴുതിയത് ശോഭാസുരേന്ദ്രന്റെ വാക്കുകള്‍ കേട്ടപ്പോള്‍ സത്യമായി.വലിയ മാളങ്ങളില്‍ നിന്നിറങ്ങി വന്നു വിഷസര്‍പ്പങ്ങള്‍ വാ തുറന്നു വിഷം ചീറ്റിയിട്ടു തിരിയെ മാളങ്ങളിലേക്ക് പോകും. സമീപവാസികള്‍ വിഷവായു ശ്വസിച്ചു ശ്വാസം മുട്ടനുഭവിക്കും.വീടും മുറ്റവും അടിച്ചു കഴുകി ചാണകം തളിച്ചത് കൊണ്ട് മാത്രം കാര്യമില്ല.സ്വന്തം വായയും മനസ്സും വൃത്തിയാക്കുവാന്‍ ഒരു ചൂല് ഉള്ളില്‍ കരുതുന്നത് കൂടി നല്ലതാണ്.”