ഭുവനേശ്വര്‍: സന്തോഷ് ട്രോഫി ദേശീയ ഫുട്‌ബോള്‍ ചാമ്പ്യന്‍ഷിപ്പില്‍ കേരളത്തിനിന്ന് സമ്മര്‍ദ്ദപ്പോരാട്ടം. വൈകീട്ട് 7-30 ന് നടക്കുന്ന മല്‍സരത്തിലെ പ്രതിയോഗികള്‍ മുന്‍ ചാമ്പ്യന്മാരായ മഹാരാഷ്ട്ര. ആദ്യ മല്‍സരത്തില്‍ ഗോവയെ തോല്‍പ്പിക്കുകയും രണ്ടാം മല്‍സരത്തില്‍ കര്‍ണാടകയോട് പരാജയപ്പെടുകയും ചെയ്ത കേരളത്തിന് ഗ്രൂപ്പിലെ ആദ്യ രണ്ട് സ്ഥാനങ്ങളിലൊന്ന് ഉറപ്പിക്കാന്‍ ഇനി തോല്‍വികള്‍ പാടില്ല.
ഗ്രൂപ്പിലെ ആദ്യ രണ്ട് സ്ഥാനക്കാര്‍ക്ക് മാത്രമാണ് സഊദി അറേബ്യയില്‍ നടക്കുന്ന സെമി പോരാട്ടങ്ങളിലിടം. ഇന്ന് നടക്കുന്ന മറ്റ് മല്‍സരങ്ങളില്‍ കര്‍ണാടക ഗോവയെയും ഒഡീഷ പഞ്ചാബിനെയും എതിരിടുന്നുണ്ട്. നിലവില്‍ രണ്ട് കളികളില്‍ നാല് പോയിന്റുമായി പഞ്ചാബാണ് മുന്നില്‍. അതേ പോയിന്റുണ്ട് രണ്ടാം സ്ഥാനക്കാരായ കര്‍ണാടകക്ക്. മൂന്നാം സ്ഥാനത്ത് നില്‍ക്കുന്ന ഒഡീഷക്കും നാലുണ്ട് പോയിന്റ്. നാലാമതാണ് കേരളം. സമ്പാദ്യം മൂന്ന് പോയിന്റ്. മുന്‍നിരയാണ് കേരളത്തിന്റെ പ്രശ്‌നം. ഗോളടിക്കാന്‍ യുവതാരങ്ങള്‍ മറക്കുന്നു. ഇന്ന് ആസിഫും ഗില്‍ബെട്ടുമെല്ലാം ഫോമിലെത്തിയാല്‍ ജയിച്ചുകയറാം.