കൊച്ചി: നടിയെ തട്ടിക്കൊണ്ടുപോയി പീഡിപ്പിക്കാന്‍ ശ്രമിച്ച കേസില്‍ സൈബര്‍ വിദഗ്ധന്‍ സായ് ശങ്കറിനെ ചോദ്യം ചെയ്യും. അന്വേഷണ ഉദ്യോഗസ്ഥന്‍ ബൈജു പൗലോസിന്റെ നേതൃത്വത്തിലുള്ള സംഘം ചൊവ്വാഴ്ച ചോദ്യം ചെയ്യലിന് ഹാജരാവാന്‍ ആവശ്യപ്പെട്ട് നോട്ടീസ് നല്‍കി.
രാവിലെ 11 മണിക്ക് ക്രൈംബ്രാഞ്ച് ഓഫീസിലോ പൊലീസ് ക്ലബിലോ ചോദ്യം ചെയ്യലിന് ഹാജരാവാനാണ് നിര്‍ദേശം. പൊലീസ് ക്ലബിലായിരിക്കും ഇയാള്‍ ചോദ്യം ചെയ്യലിന് ഹാജരാവുക. സായി ശങ്കറിന്റെ രഹസ്യമൊഴി നാളെ രേഖപ്പെടുത്തുമെന്നും സൂചനയുണ്ട്. കേസിലെ അന്വേഷണ ഉദ്യോഗസ്ഥനെ അപായപ്പെടുത്താന്‍ ശ്രമിച്ച കേസില്‍ കഴിഞ്ഞ ദിവസം സായ് ശങ്കര്‍ കീഴടങ്ങുകയും അറസ്റ്റ് രേഖപ്പെടുത്തുകയും ചെയ്തിരുന്നു.
പിന്നീട് ജാമ്യത്തില്‍ വിടുകയായിരുന്നു. ദിലീപിന്റെ മൊബൈലില്‍ നിന്നും നീക്കം ചെയ്തവയില്‍ നടിയെ ആക്രമിച്ച കേസുമായി ബന്ധപ്പെട്ട രേഖകള്‍ ഉണ്ടായിരുന്നെന്ന് കഴിഞ്ഞ ദിവസം സായ് ശങ്കര്‍ മാധ്യമങ്ങളോട് പ്രതികരിച്ചിരുന്നു. ഈ വെളിപ്പെടുത്തലിന്റെ പശ്ചാത്തലത്തിലാണ് ഇയാളെ ചോദ്യം ചെയ്യുന്നത്. ദിലീപിന്റെ ചാറ്റുകള്‍ നീക്കംചെയ്ത തന്റെ ലാപ് ടോപ് ദിലീപിന്റെ അഭിഭാഷകരുടെ കൈയില്‍ ആണെന്ന് സായ് ശങ്കര്‍ വെളിപ്പെടുത്തിയിരുന്നു.