കോട്ടയം: കെ.എസ്.ആര്‍.ടി.സി സൂപ്പര്‍ഫാസ്റ്റ് ബസിനടിയില്‍ വീണ യുവതിയെ രക്ഷപ്പെടുത്തി നാട്ടുകാര്‍. ബസിന്റെ ടയറിനടിയില്‍ കുടുങ്ങുയ യുവതിയെ മുടി മുടിമുറിച്ചാണ് നാട്ടുകാര്‍ രക്ഷിച്ചത്. തിങ്കളാഴ്ച വൈകീട്ട് നാലരയോടെ ചിങ്ങവനം പുത്തന്‍പാലത്തായിരുന്നു അപകടം. കുറിച്ചി സ്‌കൂള്‍ ജീവനക്കാരി കുറിച്ചി സ്വദേശിനി അമ്പിളിയാണ് അപകടത്തില്‍പെട്ടത്. അപകടത്തില്‍ റോഡില്‍ തലയടിച്ചതിനെ തുടര്‍ന്നു നിസ്സാര പരിക്കേറ്റ അമ്പിളിയെ ആശുപത്രിയില്‍ പ്രവേശിപ്പിച്ചു.
കുട്ടികളെ റോഡ് മുറിച്ച് കടത്തിവിട്ട ശേഷം സ്‌കൂള്‍ ബസിന് അടുത്തേക്ക് തിരികെ വരികയായിരുന്നു. ഇതുവഴി കെ.എസ്.ആര്‍.ടി.സി കോതമംഗലം ഫാസ്റ്റ് വരുന്നത് കണ്ട് വേഗത്തില്‍ നടക്കുന്നതിനിടയില്‍ ബസിന് അടിയിലേക്ക് വീഴുകയായിരുന്നു. അമ്പിളിയെ കണ്ട് ബസ് െ്രെഡവര്‍ വാഹനം പെട്ടെന്ന് ബ്രേക്ക് ചെയ്‌തെങ്കിലും ഇവരെ കടന്നാണ് നിന്നത്.
ടയറിനോട് ചേര്‍ന്ന ഭാഗത്താണ് അമ്പിളി വീണത്. ടയറിനടിയില്‍ മുടി കുടുങ്ങിയതോടെ എഴുന്നേല്‍ക്കാന്‍ കഴിയാതായി. സമീപത്ത് തട്ടുകട നടത്തുന്നയാള്‍ കത്രിക കൊണ്ട് മുടി മുറിക്കാന്‍ നോക്കിയെങ്കിലും നടന്നില്ല. പിന്നീട് കടയില്‍ നിന്ന് കത്തി വാങ്ങി മുടി മുറിച്ചാണ് അമ്പിളിയെ പുറത്തെടുത്തത്.