തിരുവനന്തപുരം മെഡിക്കൽ കോളേജിലെ പി ജി ഡോക്ടർ ഷഹന ജീവനൊടുക്കിയതുമായി ബന്ധപ്പെട്ട് കൂടുതൽ വെളിപ്പെടുത്തലുമായി സഹോദരൻ ജാസിം നാസ്. സ്ത്രീധനത്തിനായി സമ്മർദം ചെലുത്തിയത് റുവൈസാണെന്നും പിതാവ് കൂടുതൽ സ്ത്രീധനം ചോദിച്ചുവെന്നും സഹോദരൻ പറഞ്ഞു. പിതാവിനെ ധിക്കരിക്കാനാവില്ലെന്നും പണമാണ് തനിക്ക് വലുതെന്ന് റുവൈസ് പറഞ്ഞതുകോട്ട് ഷഹന തകർന്നുപോയെന്നും സഹോദരൻ പറഞ്ഞു.
‘‘റുവൈസ് ഷഹനയോട് ഇങ്ങോട്ട് വന്ന് പ്രൊപ്പോസ് ചെയ്യുകയായിരുന്നു. അവർ വിവാഹാലോചനയുമായി വന്നപ്പോൾ വീട്ടിൽ പോയി സംസാരിച്ചു. റുവൈസിന്റെ പിതാവ് നല്ല സ്ത്രീധനം ചോദിച്ചു. സഹോദരിക്ക് അത്ര ഇഷ്ടമായിരുന്നു. സ്ത്രീധനത്തിന്റെ പേരിൽ വിവാഹത്തിൽ നിന്ന് പിന്മാറിയപ്പോൾ വിഷാദത്തിലേക്ക് പോയി. അതാണ് ഈ സ്റ്റേജിലെത്തിച്ചത്’’- ജാസിം നാസ് പറയുന്നു.
‘‘പിതാവിനെ ധിക്കരിച്ച് വിവാഹം കഴിക്കാൻ റുവൈസ് തയാറായിരുന്നുവെങ്കിൽ രജിസ്റ്റർ വിവാഹം ചെയ്തു കൊടുക്കാനും തയാറായിരുന്നു. എന്നാൽ ഇങ്ങനെയാകുമെന്ന് അറിഞ്ഞില്ല. സഹോദരിക്ക് റുവൈസിനെ വലിയ ഇഷ്ടമായിരുന്നു. പെട്ടെന്ന് വിവാഹത്തിൽ നിന്ന് മാറിയപ്പോൾ അവൾക്ക് സഹിക്കാൻ പറ്റിയില്ല’’.
‘‘സ്ത്രീധനം ചോദിക്കുന്ന കുടുംബത്തിലേക്ക് സഹോദരിയെ അയക്കാൻ ഒട്ടും താൽപര്യമുണ്ടായിരുന്നില്ല. പക്ഷെ അവളുടെ ഇഷ്ടമല്ലേ? മാക്സിമം എന്തുവേണമെങ്കിലും കൊടുക്കാമെന്ന് പറഞ്ഞു. വാപ്പ സമ്മതിക്കുന്നില്ലെന്ന് സഹോദരിയെ വിളിച്ച് റുവൈസ് സംസാരിച്ചു. ആശ്വാസ വാക്കുകളെങ്കിലും പറഞ്ഞിരുന്നുവെങ്കില്‍ ഇങ്ങനെ സംഭവിക്കില്ലായിരുന്നു. പണമാണ് പ്രധാനമെന്ന് അവസാനം റുവൈസ് ഷഹനയോട് പറഞ്ഞു. അത് അവളെ വല്ലാതെ തളർത്തി’’- സഹോദരൻ പറഞ്ഞു.