കോഴിക്കോട്: കോഴിക്കോട് കോര്‍പ്പറേഷന്റെ അക്കൗണ്ടില്‍നിന്ന് കാണാതായ 2.53 രൂപ തിരിച്ചുകിട്ടി. പഞ്ചാബ് നാഷണല്‍ ബാങ്കിന്റെ ലിങ്ക് റോഡ് ശാഖാ മുന്‍ മാനേജര്‍ എം.പി റിജില്‍ തട്ടിയെടുത്ത തുകയാണ് ബാങ്ക് തിരികെ നല്‍കിയത്. തുക കോര്‍പ്പറേഷന്റെ പണം നഷ്ടപ്പെട്ട അതേ അക്കൗണ്ടിലേക്ക് തന്നെ മാറ്റി നല്‍കിയിട്ടുണ്ട്. ബാങ്കിന്റെ മുന്‍ ശാഖാ മാനേജര്‍ റിജില്‍ സ്വന്തം അക്കൗണ്ടിലേക്ക് മാറ്റിയതായാണ് കണ്ടെത്തിയത്.
പണം നഷ്ടപ്പെട്ടതായി കണ്ടെത്തിയതിനെ തുടര്‍ന്ന് ബാങ്കിലും പൊലീസിലും പരാതി നല്‍കിയിരുന്നു. ബാങ്കിന്റെ ആഭ്യന്തര ഓഡിറ്റില്‍ കോര്‍പ്പറേഷന്റെ തുക നഷ്ടപ്പെട്ടിട്ടുണ്ടെന് ബാങ്ക് സ്ഥിരികരീച്ചതോടെയാണ് പണം തിരികെ നല്‍കിയത്.
പണം തട്ടിയെടുത്ത റിജിലിനെതിരെ ബാങ്ക് മാനേജറും പരാതി നല്‍കിയിട്ടുണ്ട്. വിശ്വാസ വഞ്ചനയ്ക്കും തട്ടിപ്പിനുമാണ് ടൗണ്‍ പൊലീസ് കേസ് എടുത്തിട്ടുള്ളത്. ഒക്ടോബര്‍ നവംബര്‍ മാസത്തിലാണ് റിജില്‍ ആദ്യം അച്ഛന്റെ പിഎന്‍ബി അക്കൗണ്ടിലേക്കും പിന്നീട് ആക്‌സിസ് ബാങ്ക് അക്കൗണ്ടിലേക്കും പണം മാറ്റിയത്. പഞ്ചാബ് നാഷണല്‍ ബാങ്കിലെ സീനിയര്‍ മാനേജരായ ഇയാള്‍ ഇപ്പോള്‍ സസ്‌പെന്‍ഷനിലാണ്.