കോഴിക്കോട്:കോര്‍പറേഷന്‍ സ്റ്റേഡിയത്തില്‍ മിസോറാമിനെ കീഴടക്കി സന്തോഷ്‌ട്രോഫി ഫൈനല്‍റൗണ്ട് മത്സരത്തിലേക്ക് യോഗ്യതനേടിയതിന്റെ വിജയാഘോഷത്തിനിടെ കേരളക്യാമ്പിന് നൊമ്പരമായി മധ്യനിരതാരം റിസ്വാനലിയുടെ പിതാവിന്റെ വിയോഗവാര്‍ത്ത. തൃക്കരിപ്പൂര്‍ വല്‍വക്കാട് പി.പി മുഹമ്മദലി മരണപ്പെടുമ്പോള്‍ റിസ്വാന്‍ മിസോറാമിനെതിരെ കളിക്കളത്തില്‍ പന്തുതട്ടുകയായിരുന്നു. പിതാവിന്റെ വിയോഗവാര്‍ത്തയറിയാതെ താരം കേരളത്തിനായി അതിവേഗനീക്കങ്ങളുമായി കളംനിറഞ്ഞു. 63ാം മിനിറ്റില്‍ പരിശീലകന്‍ താരത്തെ പിന്‍വലിച്ചു.
കേരളത്തിന്റെ ഫൈനല്‍ പ്രവേശന വിജയാഘോഷത്തിനിടെ താരത്തോട് മരണവിവരം എങ്ങനെയറിയിക്കുമെന്നായിരുന്നു കേരള ടീം പരിശീലകന്‍ പി.ബി രമേശിന്റെയും മറ്റുള്ളവരുടേയും ആശങ്ക. ഒടുവില്‍ റിസ്വാനലിയെ മാറ്റിനിര്‍ത്തി മരണവിവരം അറിയിക്കാമെന്ന് തീരുമാനിച്ചു. സങ്കടംഅടക്കാനാവാതെ മൈതാനത്ത് കണ്ണീരണിയുകായിരുന്നു റിസ്വാന്‍. പിന്നീട് സഹതാരങ്ങള്‍ക്കൊപ്പം മൈതാനത്ത് തുടരാനാവാതെ സുഹൃത്തിനൊപ്പം അതിവേഗം പുറത്തേക്ക് പോകുകയും ചെയ്തു.