കേരള സംസ്ഥാന ഹജ്ജ് കമ്മിറ്റി മുഖേന ഹജ്ജിന് പോയ ഹാജിമാരുടെ മടക്ക യാത്ര ഇന്ന് ആരംഭിക്കും. മദീനയില്‍ നിന്നാണ് ഹാജിമാരുടെ മടക്ക യാത്ര. കേരളത്തിലേക്കുള്ള ആദ്യ വിമാനം ഇന്ന് വൈകുന്നേരം 5.35ന് കരിപ്പൂര്‍ വിമാനത്താവളത്തിലിറങ്ങും. കണ്ണൂരിലേക്കുള്ള ആദ്യ വിമാനം 14ന് വെള്ളിയാഴ്ച 12.45നും, കൊച്ചിയിലേക്കുള്ള വിമാനം 18ന് രാവിലെ 10 മണിക്കുമാണ് ഷെഡ്യുള്‍ ചെയ്തിട്ടുള്ളത്.
കരിപ്പൂരില്‍ ഇറങ്ങുന്ന ആദ്യ വിമാനത്തിലെ ഹാജിമാരെ 13ന് സ്പോര്‍ട്സ്, ഹജ്ജ് വഖഫ് വകുപ്പു മന്ത്രി വി.അബ്ദുറഹമാന്റെ നേതൃത്വത്തില്‍ സ്വീകരിക്കും. ഹജ്ജ് കമ്മിറ്റി ചെയര്‍മാനും ഹജ്ജ് കമ്മിറ്റി അംഗങ്ങളും സന്നിഹിതരായിരിക്കും. 11556 പേരാണ് ഇത്തവണ കേരളത്തില്‍ നിന്നും ഹജ്ജിന് യാത്ര തിരിച്ചത്. ഇതില്‍ 11252 പേര്‍ കേരളത്തില്‍ നിന്നുള്ളവും 304 പേര്‍ മറ്റു സംസ്ഥാനങ്ങളില്‍ നിന്നുള്ളവരുമാണ്.