ആറ്റിങ്ങല്‍ മണ്ഡലത്തില്‍ റീകൗണ്ടിംഗ് നടത്തിയെങ്കിലും വിജയം അടൂര്‍ പ്രകാശിന്. പോസ്റ്റല്‍ അസാധു വോട്ടുകള്‍ അടക്കം എണ്ണണമെന്നാവശ്യപ്പെട്ട് എല്‍ഡിഎഫ് പരാതി നല്‍കിയതിനെ തുടര്‍ന്നായിരുന്നു റീ കൗണ്ടിംഗ്. പതിനാറായിരത്തോളം വോട്ടുകള്‍ എണ്ണണം എന്ന് ആവശ്യപ്പെട്ടാണ് ഇടതുമുന്നണി പരാതി നല്‍കിയത്. അര്‍ദ്ധരാത്രി വരെ നീണ്ട നാടകീയത നിറഞ്ഞ റീക്കൗണ്ടിങ്ങിനു ശേഷവും വിജയം അടൂര്‍ പ്രകാശിന് തന്നെ.
തിരഞ്ഞെടുപ്പ് കമ്മീഷന്‍ മാര്‍ഗ നിര്‍ദേശ പ്രകാരമുള്ള, നിരസിക്കപ്പെട്ട പോസ്റ്റല്‍ ബാലറ്റുകളുടെ പുന:പരിശോധന നടത്തിയ ശേഷം പ്രഖ്യാപിച്ച ഫലം അനുസരിച്ച് 684 വോട്ടുകളുടെ ഭൂരിപക്ഷമാണ് അടൂര്‍ പ്രകാശിന് ലഭിച്ചിരിക്കുന്നത്. അടൂര്‍ പ്രകാശിന് – 3,28,051 വോട്ടും അഡ്വ.വി.ജോയ്ക്ക് 3,27,367 വോട്ടും വി.മുരളീധരന് – 3,11,779 വോട്ടും ലഭിച്ചു.
മൂന്നു മുന്നണികളും 3 ലക്ഷത്തിന് മുകളില്‍ വോട്ടുകള്‍ നേടി ഇഞ്ചോടിഞ്ച് മത്സരം കാഴ്ചവെച്ച മണ്ഡലമാണ് ആറ്റിങ്ങല്‍. എല്‍ഡിഎഫിന്റെ വി. ജോയിയും എന്‍ഡിഎ സ്ഥാനാര്‍ത്ഥിയായി കേന്ദ്രമന്ത്രി കൂടിയായ വി. മുരളീധരനുമാണ് രംഗത്തിറങ്ങിയത്. കേരളത്തിലെ ഏറ്റവും മികച്ച ത്രികോണ മത്സരം നടന്ന ആറ്റിങ്ങല്‍ മണ്ഡലത്തില്‍ അവസാന നിമിഷം വരെ ആര്‍ക്കാണ് വിജയമെന്നത് പ്രവചനാതീതമായിരുന്നു.