യുവാക്കളെ ജിയു-ജിത്സു പരിശീലിപ്പിക്കുന്ന വിഡിയോയുമായി കോണ്‍ഗ്രസ് നേതാവും പ്രതിപക്ഷ നേതാവുമായ രാഹുല്‍ ഗാന്ധി. ദേശീയ കായിക ദിനത്തില്‍ ആയോധനകലയായ ജിയു-ജിത്സു പരിശീലിക്കുന്ന വിഡിയോ പങ്കുവെച്ച് രാഹുല്‍ ഗാന്ധി രംഗത്തെത്തിയത്.
ഏത് സ്‌പോര്‍ട്‌സും ശാരീരികമായും മാനസികമായും നമ്മളെ ശക്തരാക്കുന്നുവെന്നും ദേശീയ കായിക ദിന ആശംസകള്‍ നേര്‍ന്നുകൊണ്ട് രാഹുല്‍ ഗാന്ധി പറഞ്ഞു. രാഹുല്‍ ഗാന്ധിയുടെ ഔദ്യോഗിക യൂടൂബ് ചാനലില്‍ ജിയു-ജിത്സു പരിശീലിക്കുന്നതിന്റെ വിശദമായ വിഡിയോയും പങ്കുവെച്ചിട്ടുണ്ട്.
യുവാക്കളില്‍ ശ്രദ്ധ, അഹിംസ, സ്വയം പ്രതിരോധം, ശക്തി എന്നിവ വളര്‍ത്തിയെടുക്കാന്‍ ഈ ആയോധനകലയുടെ അഭ്യാസത്തിലൂടെ ശ്രമിച്ചുവെന്ന് എക്സില്‍ പങ്കുവെച്ച വിഡിയോയില്‍ രാഹുല്‍ കുറിച്ചു.’ഭാരത് ജോഡോ നീതി യാത്രയ്ക്കിടെ ഞങ്ങളുടെ ക്യാമ്പില്‍ ജിയു-ജിത്സു പരിശീലനം ദിനചര്യയുടെ ഭാഗമായി. ഈ ആയോധനകലയുടെ അഭ്യാസത്തിലൂടെ യുവാക്കളില്‍ ശ്രദ്ധ, അഹിംസ, സ്വയം പ്രതിരോധം, ശക്തി എന്നിവ വളര്‍ത്തിയെടുക്കാന്‍ ഞങ്ങള്‍ ശ്രമിച്ചു.
യുവാക്കള്‍ക്കിടയിലെ ഇത്തരം അഭ്യസ പരിശീലനങ്ങള്‍ സുരക്ഷിതമായ ഒരു സമൂഹത്തിനെ വാര്‍ത്തെടുക്കുന്നതിനുള്ള ഉപകരണമായി എളുപ്പത്തില്‍ മാറും. ഇതാണ് സ്പോര്‍ട്സിന്റെ സൗന്ദര്യം- നിങ്ങള്‍ ഏത് സ്പോര്‍ട്സ് കളിച്ചാലും അത് നിങ്ങളെ ശാരീരികമായും മാനസികമായും ശക്തരാക്കുന്നു. ദേശീയ കായിക ദിനത്തില്‍ നിങ്ങള്‍ക്കെല്ലാവര്‍ക്കും ആശംസകള്‍’- എന്നാണ് രാഹുല്‍ കുറിച്ചത്.