ന്യൂഡല്‍ഹി: റാഫേല്‍ യുദ്ധവിമാനം വാങ്ങിയതുമായി ബന്ധപ്പെട്ട് കേന്ദ്ര പ്രതിരോധമന്ത്രി നിര്‍മല സീതാരാമന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ മറുപടി. ‘നിങ്ങള്‍ എന്താണ് ഞങ്ങളുടെ വില നിങ്ങളുടെ വില എന്ന് പറയുന്നത്? നിങ്ങള്‍ എന്താണ് വാങ്ങിയത്?’ എന്നായിരുന്നു നിര്‍മല സീതാരാമന്റെ ചോദ്യം. ഇതിനാണ് രാഹുല്‍ ഗാന്ധി ഇന്ന് മറുപടി പറഞ്ഞിരിക്കുന്നത്.
യു.പി.എ സര്‍ക്കാര്‍ ഒരു വിമാനം 526 കോടി രൂപക്കാണ് വാങ്ങാന്‍ തീരുമാനിച്ചതെങ്കില്‍ മോഡി സര്‍ക്കാര്‍ ഒരു വിമാനം 1670 കോടിക്കാണ് വാങ്ങാന്‍ തീരുമാനിച്ചിരിക്കുന്നത്. 40000 കോടിയാണ് രാജ്യത്തിന് നഷ്ടം. മന്ത്രി പറയുന്നത് ഞങ്ങളുടെ പണം കൊടുത്തുവെന്നാണ്. അവരുടെ പണത്തെക്കുറിച്ച് ആര് ശ്രദ്ധിക്കുന്നുവെന്നാണ്. ജനങ്ങള്‍ ശ്രദ്ധിക്കുന്നുവെന്നാണ് മറുപടി. രാഹുല്‍ ട്വീറ്റ് ചെയ്തു.
റാഫേല്‍ ഇടപാടുമായി ബന്ധപ്പെട്ട് കോണ്‍ഗ്രസ് ആദ്യം മുതല്‍ അഴിമതിയാരോപിച്ചിരുന്നു. എന്നാല്‍ അതിനോട് കൃത്യമായി പ്രതികരിക്കാന്‍ കേന്ദ്രസര്‍ക്കാര്‍ തയ്യാറായിരുന്നില്ല. രാജ്യത്തിന്റെ പ്രതിരോധ സംവിധാനവുമായി ബന്ധപ്പെട്ട വിഷയമായതിനാല്‍ ഇത്തരം വിവരങ്ങള്‍ വെളിപ്പെടുത്താന്‍ കഴിയില്ലെന്നായിരുന്നു പ്രതിരോധമന്ത്രിയും ധനമന്ത്രിയും പറഞ്ഞത്.