കല്‍പ്പറ്റ: ജോഡോ യാത്രയ്ക്കുശേഷം ആദ്യമായി രാഹുല്‍ഗാന്ധി എംപി വയനാട്ടിലെത്തി. ഇന്നു ജില്ലയില്‍ വിവിധ പരിപാടികളില്‍ പങ്കെടുക്കും. മണിയങ്കോടിനു സമീപം കുടുംബത്തിന് കോണ്‍ഗ്രസ് നിര്‍മിച്ചുനല്‍കുന്ന വീട് രാവിലെ ഒന്‍പതിന് സന്ദര്‍ശിക്കും. 10 മുതല്‍ കളക്ടറേറ്റില്‍ യോഗങ്ങളില്‍ പങ്കെടുക്കും. കേന്ദ്രാവിഷ്‌കൃത പദ്ധതികളുടെ അവലോകനത്തിനുള്ള ഡിസ്ട്രിക്ട് ഡവലപ്മെന്റ് കോര്‍ഡിനേഷന്‍ ആന്‍ഡ് മോണിറ്ററിംഗ് കമ്മിറ്റി (ദിശ) യോഗം രാഹുല്‍ ഗാന്ധി എം.പിയുടെ അധ്യക്ഷതയില്‍ രാവിലെ 10 ന് കളക്ടറേറ്റ് മിനി കോണ്‍ഫ്രന്‍സ് ഹാളില്‍ ചേരും.
ഉച്ചയ്ക്ക് 12ന് ആസ്പിരേണല്‍ ഡിസ്ട്രിക്ട് പ്രോഗ്രാം അവലോകന യോഗത്തിലും 12.30ന് ജില്ലാ ഇലക്ട്രിസിറ്റി കമ്മിറ്റി യോഗത്തിലും എം.പി പങ്കെടുക്കും. തൊണ്ടര്‍നാട് പുതുശേരിയില്‍ കടുവ ആക്രമണത്തെത്തുടര്‍ന്നു മരിച്ച പള്ളിപ്പുറത്ത് തോമസിന്റെ വീട് ഉച്ചകഴിഞ്ഞ് സന്ദര്‍ശിക്കും. 3.30ന് മീനങ്ങാടി ശ്രീകണ്ഠ സ്റ്റേഡിയത്തില്‍ നടക്കുന്ന പൊതുസമ്മേളനത്തിലും രാഹുല്‍ പ്രസംഗിക്കും. നിര്‍ധന കുടുംബങ്ങള്‍ക്കായി കോണ്‍ഗ്രസ് നിര്‍മിച്ച 25 വീടുകളുടെ താക്കോല്‍ദാനവും അദ്ദേഹം നിര്‍വഹിക്കും. മീനങ്ങാടിയില്‍ എംപിക്ക് ഉജ്വല സ്വീകരണം നല്‍കാനൊരുങ്ങുകയാണ് യു.ഡി.എഫ്. സ്വീകരണത്തില്‍ ഏഴായിരത്തോളം പേര്‍ പങ്കെടുക്കും.