കല്‍പ്പറ്റ: രാഹുല്‍ഗാന്ധി എം.പി ഏഴ്, എട്ട്, ഒമ്പത് തിയ്യതികളില്‍ വയനാട് പാര്‍ലമെന്റ് മണ്ഡലത്തിലെ വിവിധ പരിപാടികളില്‍ പങ്കെടുക്കും. ഏഴിന് രാവിലെ 11 മണിക്ക് തിരുവമ്പാടി മുക്കം എം എം ഒ എല്‍ പിസ്‌കൂളിലെ പുതിയതായി നിര്‍മ്മിച്ച കെട്ടിടത്തിന്റെ ഉദ്ഘാടനമാണ് മണ്ഡലത്തിലെ എം പിയുടെ ആദ്യപരിപാടി.
തുടര്‍ന്ന് ഉച്ചക്ക് ശേഷം മൂന്ന് മണിക്ക് വയനാട് ജില്ലയിലെ പൊഴുതന ഗ്രാമപഞ്ചായത്തില്‍ പി എം ജി എസ് വൈ പദ്ധതി പ്രകാരം നിര്‍മ്മിച്ച അച്ചൂര്‍ചാത്തോത്ത് റോഡ് അദ്ദേഹം ഉദ്ഘാടനം ചെയ്യും. വൈകിട്ട് നാല് മണിക്ക് കല്‍പ്പറ്റ പുതിയ ബസ്റ്റാന്റിന് സമീപത്തെ അഡ്വ. ടി സിദ്ദിഖ് എം എല്‍ എയുടെ ഓഫീസ് രാഹുല്‍ഗാന്ധി ഉദ്ഘാടനം ചെയ്യും. തുടര്‍ന്ന് വൈകിട്ട് അഞ്ചേകാലിന് മീനങ്ങാടി കമ്മ്യൂണിറ്റി ഹാളില്‍ നടക്കുന്ന കോണ്‍ഗ്രസ് യുണിറ്റ് കമ്മിറ്റി മീറ്റിംഗില്‍ അദ്ദേഹം സംസാരിക്കും.
മാര്‍ച്ച് എട്ടിന് രാവിലെ 11.15ന് പി എം ജി എസ് വൈ പദ്ധതിയില്‍ ഉള്‍പ്പെടുത്തി നിര്‍മ്മിക്കുന്ന ചുണ്ടക്കരഅരിഞ്ചേര്‍മലചുണ്ടക്കുന്ന് റോഡിന്റെ പ്രവൃത്തി ഉദ്ഘാടനം രാഹുല്‍ഗാന്ധി നിര്‍വഹിക്കും. ഉച്ചക്ക് 12.20ന് തരിയോട് ഗ്രാമപഞ്ചായത്തിനോട് അനുബന്ധിച്ച് നിര്‍മ്മിച്ച കെട്ടിടം എം പി ഉദ്ഘാടനം ചെയ്യും. ഉച്ചക്ക് ശേഷം മൂന്നരക്ക് പുല്‍പ്പള്ളി ആടിക്കൊല്ലി വിനോദ് യുവജനസമുച്ചയവും, നാലരക്ക് മുള്ളന്‍കൊല്ലി മണ്ഡലം കോണ്‍ഗ്രസ് കമ്മിറ്റി ഓഫീസും അദ്ദേഹം ഉദ്ഘാടനം ചെയ്യും.
ഒമ്പതിന് രാവിലെ 11 മണിക്ക് വയനാട് കലക്ട്രേറ്റില്‍ നടക്കുന്ന കേന്ദ്രാവിഷ്‌കൃത പദ്ധതികളുടെ അവലോകനയോഗമായ ദിശയില്‍ പങ്കെടുത്ത ശേഷം ജില്ലയില്‍ നിന്നും മടങ്ങുന്ന എം പി വൈകിട്ട് നാലിന് മലപ്പുറം ഏറനാട് അരീക്കോട് സുല്ലമുസലാം ആര്‍ട്ട്‌സ് ആന്റ് സയന്‍സ് കോളജിന്റെ ഇന്‍ഡോര്‍ സ്‌റ്റേഡിയം ഉദ്ഘാടനം ചെയ്യും. വൈകിട്ട് അഞ്ചരയോടെ എടവണ്ണ ജാമിയ നദ്‌വിയ്യയിലെ ആണ്‍കുട്ടികളുടെ ഹോസ്റ്റല്‍ സമുച്ചയത്തിന് അദ്ദേഹം ശിലയിടുന്നതോടെയാണ് മൂന്ന് ദിവസം നീണ്ടുനില്‍ക്കുന്ന മണ്ഡലത്തിലെ പരിപാടികള്‍ക്ക് സമാപനമാകുക.