ന്യൂഡല്‍ഹി: ബി.ജെ.പിയോട് വെറുപ്പോ വിദ്വേഷമോ ഇല്ലെന്നും എന്നാല്‍ തന്റെ ശരീരത്തിലെ ഓരോ അണുവും സഹജമായി തന്നെ അവരുടെ ആശയത്തോട് ചെറുത്തുനില്‍ക്കുകയാണെന്നും രാഹുല്‍ ഗാന്ധി. ട്വിറ്ററില്‍ പോസ്റ്റ് ചെയ്ത രാജിക്കത്തിലാണ് രാഹുല്‍ ബി.ജെ.പിയോടുള്ള നിലപാട് വ്യക്തമാക്കിയത്.
എന്റെ പോരാട്ടം രാഷ്ട്രീയാധികാരത്തിന് വേണ്ടിയുള്ളതായിരുന്നില്ല. ബി.ജെ.പിയോട് എനിക്ക് വിരോധമോ ദേഷ്യമോ ഇല്ല. എന്നാല്‍ എന്റെ ശരീരത്തിലെ ജീവനുള്ള ഓരോ അണുവും അവരുടെ ആശയത്തോട് സഹജമായി തന്നെ ചെറുത്തു നില്‍ക്കുകയാണ.് ആ ചെറുത്തു നില്‍പിന് കാരണം എന്നില്‍ അവരമായി നിരന്തരം കലഹിക്കുന്ന ഒരു ഇന്ത്യന്‍ ആശയം ഉള്ളതു കൊണ്ടാണ്. ഇത് പുതിയ ഒരു യുദ്ധമല്ല. സഹസ്രാബ്ദങ്ങളായി നമ്മുടെ മണ്ണില്‍ നടന്നു വരുന്ന പോരാട്ടമാണ്. അവര്‍ ഭിന്നത കാണുമ്പോള്‍ ഞാന്‍ സാമ്യങ്ങള്‍ കാണുന്നു. അവര്‍ ഭയത്തോടെ കാണുന്നതിനെ ഞാന്‍ സ്‌നേഹമായി കാണുന്നു, ആലിംഗനം ചെയ്യുന്നു.
നമ്മുടെ രാജ്യത്തിന്റെയും ഭരണഘടനയുടേയും ചട്ടക്കൂട് തകര്‍ക്കാനുള്ള ശ്രമങ്ങളാണ് നടക്കുന്നത്. ഇതിനെതിരായ പോരാട്ടത്തില്‍ നിന്ന് ഒരിക്കലും പിന്നോട്ട് പോവില്ല. എന്റെ അവസാന ശ്വാസം വരെ അതിനെതിരെ പോരാടുക തന്നെ ചെയ്യും-രാഹുല്‍ വ്യക്തമാക്കി.