ടിക്കറ്റ് എടുക്കാത്തത് ചോദ്യം ചെയ്ത ബസ് കണ്ടക്ടറെ യാത്രക്കാരന്‍ മര്‍ദിച്ച് കൊലപ്പെടുത്തി. ചെന്നൈയിലെ എം.ടി.സി ബസ് കണ്ടക്ടര്‍ ജഗന്‍ കുമാര്‍(52) ആണ് കൊല്ലപ്പെട്ടത്. വെല്ലൂര്‍ സ്വദേശി ഗോവിന്ദനാണ് ജഗന്‍ കുമാറിനെ മര്‍ദിച്ച് കൊലപ്പെടുത്തിയത്.
ഇന്നലെ രാത്രിയായിരുന്നു സംഭവം. രാത്രി ഏഴരയോടെ കോയമ്പേട്ടിലേക്ക് പോയ ബസില്‍ അണ്ണാനഗര്‍ ആര്‍ച്ചില്‍ നിന്ന് യാത്രക്കാരനായ ഗോവിന്ദന്‍ കയറി. കണ്ടക്ടര്‍ ടിക്കറ്റ് എടുക്കാന്‍ ആവശ്യപ്പെട്ടെങ്കിലും ഇയാള്‍ തയ്യാറായില്ല. എന്നാല്‍ ദേഷ്യപ്പെട്ട് കണ്ടക്ടര്‍ ഇയാളെ ടിക്കറ്റ് മെഷിന്‍ കൊണ്ട് അടിക്കുകയായിരുന്നു. തുടര്‍ന്ന് ഗോവിന്ദന്‍ കണ്ടക്ടറെയും മര്‍ദിച്ചു.
പരിക്കേറ്റ ഇരുവരെയും ആശുപത്രിയില്‍ പ്രവേശിപ്പിച്ചുവെങ്കിലും ജഗനെ രക്ഷിക്കാനായില്ല. ഗോവിന്ദന്‍ ചികിത്സയില്‍ തുടരുകയാണ്. ഇയാള്‍ക്കെതിരെ കൊലപാതകക്കുറ്റം ചുമത്തി അമിഞ്ചികരൈ പൊലീസ് കേസെടുത്തു. സംഭവത്തെ തുടര്‍ന്ന് നഗരത്തില്‍ ബസ് ജീവനക്കാര്‍ മിന്നല്‍ പണിമുടക്ക് നടത്തി.