കുവൈത്ത് സിറ്റി: ഇന്ത്യന്‍ യൂണിയന്‍ മുസ്ലിംലീഗിന്റെ സ്ഥാപക പ്രസിഡണ്ടും ഭരണഘടന നിര്‍മ്മാണ സഭയില്‍ അംഗവുമായിരുന്ന ഖാഇദേമില്ലത്ത് മുഹമ്മദ് ഇസ്മാഈല്‍ സാഹിബിന്റെ നാമധേയത്തില്‍ ഒരു സ്മാരകം ദില്ലിയില്‍ യാഥാര്‍ത്ഥ്യമാക്കുന്നതിന്റെ ഭാഗമായി നിര്‍മ്മിക്കുന്ന ഖായിദേ മില്ലത്ത് സൗധത്തിനു വേണ്ടി ജനകീയ ഫണ്ട് സമാഹരണത്തിനു കുവൈത്ത് കെ.എം.സി.സി. തുടക്കം കുറിച്ചു.
ഇതിന്റെ ഭാഗമായി കുവൈത്ത് അബ്ബാസിയ കെ.എം.സി.സി. ഓഡിറ്റോറിയത്തില്‍ നടന്ന പ്രത്യേക യോഗം മുസ്ലിംലീഗ് സംസ്ഥാന സെക്രട്ടറി അബ്ദുറഹിമാന്‍ രണ്ടത്താണി ഉദ്ഘാടനം ചെയ്തു.ഉപദേശക സമിതി ചെയര്‍മാന്‍ സയ്യിദ് നാസര്‍ മശ്ഹൂര്‍ തങ്ങളുടെ പ്രാര്‍ത്ഥനയോടെ തുടങ്ങിയ പരിപാടിയില്‍ കുവൈത്ത് കെ.എം.സി.സി. പ്രസിഡന്റ് ശറഫുദ്ധീന്‍ കണ്ണേത്ത് അധ്യക്ഷനായിരുന്നു. മുസ്ലീം ലീഗ് സംസ്ഥാന പ്രസിഡന്റ് സാദിഖലി ശിഹാബ് തങ്ങളുടെ പ്രത്യേക നിര്‍ദ്ദേശ പ്രകാരമാണ് ഫണ്ട് സമാഹരണം തുടങ്ങിയിട്ടുള്ളത്.
ഫണ്ട് ഉദ്ഘാടനം മെഡ്-എക്‌സ് ചെയര്‍മാന്‍ ഫാസ് മുഹമ്മദലി രണ്ടത്താണിക്ക് നല്‍കിക്കൊണ്ട് നിര്‍വ്വഹിച്ചു. ഫാസ് മുഹമ്മദലി ആശംസകളര്‍പ്പിച്ചു. സംസ്ഥാന ഭാരവാഹികള്‍, പ്രവര്‍ത്തക സമിതി അംഗങ്ങള്‍, ജില്ലാ-മണ്ഡലം ഭാരവാഹികള്‍ പ്രധാന പ്രവര്‍ത്തകര്‍ തുടങ്ങിയവര്‍ യോഗത്തില്‍ സന്നിഹിതാരായിരുന്നു. ജനറല്‍ സെക്രട്ടറി എം.കെ.അബ്ദുല്‍ റസാഖ് സ്വാഗതവും ട്രഷറര്‍ എം.ആര്‍. നാസര്‍ നന്ദിയും പറഞ്ഞു.