തനിക്ക് നേരെയുള്ള പ്രതിഷേധവും ആക്രമവും ബിജെപി അധികാരത്തില്‍ നിന്ന് പുറത്താകുന്നതിന്റെ സൂചനയാണെന്ന് തൃണമൂല്‍ കോണ്‍ഗ്രസ് നേതാവും പശ്ചിമബംഗാള്‍ മുഖ്യമന്ത്രിയുമായ മമതാ ബാനര്‍ജി. ഒരുപാട് വട്ടം അതിക്രമങ്ങള്‍ നേരിടേണ്ടി വന്നിട്ടുണ്ടെന്നും കയ്യൂക്ക് കൊണ്ട് തന്നെ തടയാനാകില്ലെന്നും മമത തുറന്നടിച്ചു.
ഉത്തര്‍പ്രദേശ് നിയമസഭാ തെരഞ്ഞെടുപ്പ് പ്രചാരണത്തിന്റെ ഭാഗമായി മമത വാരണാസിയിലെത്തിയ സമയം സംഘപരിവാര്‍ സംഘടനയായ ഹിന്ദു യുവവാഹിനിയുടെ പ്രവര്‍ത്തകര്‍ മമതയുടെ വാഹനം തടഞ്ഞിരുന്നു. ബുധനാഴ്ച വൈകുന്നേരമാണ് സംഭവം നടന്നത്. സംഭവത്തിന് പിന്നാലെ വാരണാസിയില്‍ നടന്ന എസ്പി റാലിയിലാണ് മമത പ്രതികരണം നടത്തിയത്.
താന്‍ നിരവധി തവണ ആക്രമിക്കപ്പെട്ടിട്ടുണ്ടെന്നും അടിയേറ്റും വെടികൊണ്ടും അനുഭവമുണ്ടെന്നും മമത പറഞ്ഞു. ‘ഞാന്‍ ഒരിക്കലും തലകുനിച്ചിട്ടില്ല. ഞാന്‍ പോരാളിയാണ്, ഭീരുവല്ല.’, മമത പറഞ്ഞു.