ഭാരത്മാല പരിയോജനക്ക് കീഴിലുള്ള മൈസൂര്‍-മലപ്പുറം റോഡ് പദ്ധതി കോഴിക്കോട് വിമാനത്താവളത്തിലേക്ക് നീട്ടുന്ന കാര്യം കേന്ദ്ര സര്‍ക്കാറിന്റെ പരിഗണനയിലുണ്ടെന്ന് റോഡ് ഗതാഗത, ഹൈവേ വകുപ്പ് മന്ത്രി നിതിന്‍ ജയ്‌റാം ഗഡ്കരി മലപ്പുറം ലോക്‌സഭാംഗം ഡോ. എം പി. അബ്ദുസ്സമദ് സമദാനിയെ അറിയിച്ചു. ഇത് സംബന്ധമായ പ്രൊജക്റ്റ്, അലൈന്‍മെന്റ്, ചിലവ്, പ്രായോഗികത തുടങ്ങിയ കാര്യങ്ങള്‍ക്ക് അന്തിമരൂപം നല്‍കുന്നതിനായി വിശദമായ പദ്ധതി റിപ്പോര്‍ട്ട് (ഡി.പി.ആര്‍) തയ്യാറാക്കുന്നതിന്റെ നടപടിക്ക് തുടക്കം കുറിച്ചതായി ലോക്‌സഭയില്‍ സമദാനിയുടെ ചോദ്യത്തിന് രേഖാമൂലം നല്‍കിയ മറുപടിയില്‍ മന്ത്രി പറഞ്ഞു.
മുന്‍ഗണനാക്രമത്തിലും ഗതാഗതം, ഫണ്ടിന്റെ ലഭ്യത, ആവശ്യകത എന്നിവ നോക്കിയുമാണ് പദ്ധതികള്‍ ഏറ്റെടുക്കുന്നത്. സംസ്ഥാന സര്‍ക്കാറുമായി കൂടിയാലോചിച്ചാണ് പദ്ധതിയുടെ അലൈന്‍മെന്റിന് അന്തിമരൂപം നല്‍കുന്നതെന്നും മന്ത്രി മറുപടിയില്‍ പറഞ്ഞു. മലപ്പുറം ജില്ലയിലെ ദേശീയ ഹൈവേ പദ്ധതിയുമായി കരിപ്പൂര്‍ രാജ്യാന്തര വിമാനത്താവളത്തെ ബന്ധിപ്പിക്കുന്നത് സംബന്ധിച്ചായിരുന്നു സമദാനിയുടെ ചോദ്യം.