ന്യൂഡല്‍ഹി: കേന്ദ്ര റെയില്‍വെമന്ത്രി പീയുഷ് ഗോയല്‍ പൊതുമേഖലാ ബാങ്കുകളില്‍ നിന്നും 650 കോടി രൂപയുടെ തട്ടിപ്പ് നടത്തിയതായി റിപ്പോര്‍ട്ട്.
പീയുഷ് ഗോയല്‍ ഡയറക്ടറായ ഷിര്‍ദി ഇന്റസ്ട്രിയല്‍ കമ്പനിയാണ് വന്‍ തട്ടിപ്പ് നടത്തിയത്. ഈ കമ്പനി പീയുഷ് ഗോയലിന്റ ഭാര്യ സീമാ ഗോയല്‍ ഡയറക്ടറായിരിക്കുന്ന ഇന്റര്‍കോണ്‍ അഡൈ്വസേഴ്‌സിന് വന്‍ തുകകള്‍ വായ്പയായി നല്‍കിയിരുന്നതായും രേഖകള്‍ ചൂണ്ടിക്കാട്ടുന്നു. ദി വയര്‍ മാസികയാണ് തട്ടിപ്പുകഥ പുറത്തു വിട്ടത്.
കോടികളുടെ തട്ടിപ്പ് നടത്തിയ പീയുഷ് ഗോയല്‍ രാജി വെക്കണമെന്ന് കോണ്‍ഗ്രസ് ആവശ്യപ്പെട്ടു. മോദി മന്ത്രിസഭയില്‍ അംഗമാകുന്നതിനു മുമ്പത്തെ കാലയളവില്‍ ഷിര്‍ദി ഇന്റസ്ട്രിയലിന്റെ ഡയറക്ടറായിരുന്നു പീയുഷ് ഗോയല്‍. ഈ കാലയളവില്‍ പൊതുമേഖലാ ബാങ്കുകളില്‍ നിന്നും വ്യവസായിക ആവശ്യങ്ങള്‍ക്കായി വായ്പ എടുത്ത കമ്പനി തിരിച്ചടവില്‍ വീഴ്ച വരുത്തി. 2014ല്‍ തിരിച്ചടവ് പൂര്‍ണമായും മുടങ്ങി. എന്നാല്‍ ആ വര്‍ഷം വാണിജ്യ മന്ത്രിയായി പീയുഷ് ഗോയല്‍ ചുമതലയേറ്റതോടെ കമ്പനിക്കെതിരെ കാര്യമായ അന്വേഷണമോ നടപടിയുണ്ടായില്ല.
മോദി വിശ്വസ്തരുടെ പട്ടികയില്‍ ഇടം നേടിയതോടെ ക്യാബിനറ്റ് റാങ്കോടെ റെയില്‍വെമന്ത്രിയായി പീയുഷിനെ ഉയര്‍ത്തിയെങ്കിലും വായ്പാ തിരിച്ചടവിന് കമ്പനി തയാറായില്ല. വിജയ് മല്യ, നീരവ് മോദി തുടങ്ങിയ വമ്പന്മാരുടെ തട്ടിപ്പ് പുറത്തു വന്നതിനു പിന്നാലെ വയര്‍ മാസിക നടത്തിയ അന്വേഷമത്തിലാണ് കേന്ദ്രമന്ത്രിയുടെ കമ്പനി തന്നെ തട്ടിപ്പ് നടത്തിയതായി വ്യക്തമായത്. ഗ്ലോബല്‍ അനലറ്റിക് കമ്പനിയായ ക്രിസില്‍ 2010 മുതല്‍ ഷിര്‍ദി വ്യവസായ ഗ്രൂപ്പിന്റെ മോശമായ പ്രകടനം നിരീക്ഷിക്കുന്നുണ്ടായിരുന്നു.