കടുവ ആക്രമണത്തില്‍ കൊല്ലപ്പെട്ട രാധയുടെ വീട് സന്ദര്‍ശിച്ച് പ്രിയങ്കാ ഗാന്ധി

പഞ്ചാരക്കൊല്ലിയില്‍ കടുവ ആക്രമണത്തില്‍ കൊല്ലപ്പെട്ട രാധയുടെ വീട് സന്ദര്‍ശിച്ച് വയനാട് എംപി പ്രിയങ്ക ഗാന്ധി. വയനാട് നേരിടുന്ന വന്യ ജീവി പ്രശ്‌നങ്ങള്‍ പരിഹരിക്കുന്നതിനുള്ള നടപടികള്‍ സ്വീകരിക്കുമെന്ന് പ്രിയങ്ക ഗാന്ധി കുടുംബാംഗങ്ങളോട് പറഞ്ഞു. കുടുംബത്തിന് സാമ്പത്തിക സഹായം നല്‍കുമെന്നും പ്രിയങ്കാ ഗാന്ധി അറിയിച്ചു.

പ്രിയങ്ക ഗാന്ധിക്കൊപ്പം ഐസിസി ജനറല്‍ സെക്രട്ടറി കെ സി വേണുഗോപാലും വീട് സന്ദര്‍ശിച്ചു. രാധയുടെ മകന്റെ ജോലിയുടെ കാര്യം ശരിയാകുമെന്ന് പ്രിയങ്ക ഗാന്ധി പറഞ്ഞു.വയനാട്ടില്‍ നിരന്തരമായി നടക്കുന്ന വന്യജീവി ആക്രമണത്തില്‍ ജനങ്ങള്‍ ഭീതിയിലാണെന്നും ജനങ്ങളുടെ ആശങ്ക അകറ്റി സുരക്ഷ ഉറപ്പാക്കുന്ന നടപടികള്‍ അടിയന്തിരമായി സ്വീകരിക്കണമെന്നും പ്രിയങ്ക ഗാന്ധി ആവശ്യപ്പെട്ടിരുന്നു.

വളര്‍ത്തു മൃഗങ്ങള്‍ വ്യാപകമായി കൊല്ലപ്പെടുന്നതിലും കൃഷിയിടങ്ങള്‍ നശിപ്പിക്കപ്പെടുന്നതിലും ജനങ്ങള്‍ വലിയ ആശങ്കയിലാണെന്നും പ്രിയങ്ക ഗാന്ധി പറഞ്ഞിരുന്നു.

കെപിസിസി പ്രസിഡന്റ് കെ സുധാകരന്‍, ടി സിദ്ദിഖ് എംഎല്‍എ തുടങ്ങിയവര്‍ പ്രിയങ്കയെ അനുഗമിച്ചിരുന്നു.