വയനാട്ടിലെ യു.ഡി.എഫ്‌ സ്ഥാനാർഥി പ്രിയങ്ക ഗാന്ധി ഇന്ന് നാമനിർദേശ പത്രിക സമർപ്പിക്കും. റോഡ് ഷോയായി വയനാട് കലക്ട്രേറ്റിലെത്തിയാണ് നാമനിർദേശ പത്രിക നൽകുക. പതിനൊന്ന് മണിക്ക് കല്പറ്റ ബസ് സ്റ്റാൻഡ് പരിസരത്ത് നിന്ന് തുടങ്ങുന്ന റോഡ് ഷോയിൽ രാഹുൽ ഗാന്ധിയും പങ്കെടുക്കും.
2019ല്‍ വയനാട്ടിലേക്ക് മാസ് എന്‍ട്രി നടത്തിയ സഹോദരന്‍ രാഹുല്‍ ഗാന്ധി 4,31,770 എന്ന കേരളത്തിലെ റെക്കോഡ് ഭൂരിപക്ഷത്തിനാണ് വിജയിച്ചത്. പക്ഷേ കഴിഞ്ഞ തവണ സി.പി.ഐയുടെ ദേശീയ നേതാവ് ആനി രാജ എതിരാളിയായി വന്നതോടെ രാഹുലിന്റെ ഭൂരിപക്ഷം 3,64,422 ആയി കുറഞ്ഞു. ഇത്തവണ ഉപതെരഞ്ഞെടുപ്പില്‍ പ്രിയങ്ക ഗാന്ധിക്ക് അഞ്ചുലക്ഷത്തില്‍ കവിഞ്ഞ ഭൂരിപക്ഷം കിട്ടുമെന്നാണ് യു.ഡി.എഫിന്റെ പ്രതീക്ഷ. കന്നിയങ്കത്തില്‍ മിന്നും ജയം ഉറപ്പാക്കുന്നതിനാണ് ഇന്ന് കല്‍പറ്റയില്‍ നടക്കുന്ന റോഡ്‌ഷോയില്‍ പ്രിയങ്കയും രാഹുലും സോണിയാ ഗാന്ധിയുമടക്കം പങ്കെടുക്കുന്നത്. ഒപ്പം എ.ഐ.സി.സി പ്രസിഡന്റ് മല്ലികാര്‍ജുന്‍ ഖാര്‍ഗെയുമുണ്ട്.
കഴിഞ്ഞ പാര്‍ലമെന്റ് തെരഞ്ഞെടുപ്പില്‍ യു.പിയില്‍ ഇന്ത്യ സഖ്യത്തിന് വന്‍മുന്നേറ്റമുണ്ടാക്കിയതിന്റെ ക്രഡിറ്റ് പ്രിയങ്കക്കായിരുന്നു. 2019ല്‍ 64 സീറ്റുകള്‍ നേടിയ എന്‍.ഡി.എ കഴിഞ്ഞതവണ 36 സീറ്റിലേക്കാണ് കൂപ്പുകുത്തിയത്. ഇന്ത്യ സഖ്യം 43 സീറ്റുമായി വന്‍ മുന്നേറ്റം നടത്തി.
എ.ഐ.സി.സി ജനറല്‍ സെക്രട്ടറിയായ പ്രിയങ്കയ്ക്ക് കോണ്‍ഗ്രസിന്റെ തെരഞ്ഞെടുപ്പ് തന്ത്രങ്ങള്‍ രൂപപ്പെടുത്തുന്നതില്‍ സുപ്രധാനമായ പങ്കാണുള്ളത്. 2019ലും കഴിഞ്ഞ തവണയും രാഹുലിന്റെ പ്രചാരണത്തിനായി പ്രിയങ്ക ഗാന്ധി വയനാട്ടില്‍ എത്തിയത് വന്‍ ഓളമുണ്ടാക്കിയിരുന്നു. രാഷ്ട്രീയത്തിനപ്പുറം ഉരുക്കുവനിത ഇന്ദിരാ ഗാന്ധിയോടുള്ള സാദൃശ്യവും ഹിന്ദിയിലും ഇംഗ്ലിഷിലുമുള്ള പ്രസംഗപാടവവും പ്രിയങ്കയെ ഇതിനകം വയനാടിന്റെ പ്രിയങ്കരിയാക്കിയിട്ടുണ്ട്.
മലപ്പുറം ജില്ലയിലെ മൂന്ന് നിയമസഭാ മണ്ഡലങ്ങളും കോഴിക്കോട് ജില്ലയിലെ ഒന്നും വയനാട്ടിലെ മൂന്ന് മണ്ഡലങ്ങളും ഉള്‍പ്പെടുന്ന വയനാട് ലോക്‌സഭാ മണ്ഡലം 2009ലാണ് രൂപവത്കരിച്ചത്. അന്നു മുതല്‍ കോണ്‍ഗ്രസിന്റെ കുത്തക സീറ്റാണിത്. കല്‍പ്പറ്റയില്‍ നടത്തുന്ന റോഡ് ഷോക്ക് ശേഷം ഇന്ന് ഉച്ചയോടെ പ്രിയങ്കാ ഗാന്ധി പത്രിക സമര്‍പ്പിക്കും.